Mamitah Indo-Bangla meeting neih a ni

Nimin khan Mamit DC conference hall-ah 1st Indo-Bangla Border Meeting neih a ni a, India sorkar aiawhte leh Bangladesh sorkar aiawhte an inkâwm.

Meeting hi kum 2012-a India leh Bangladesh inlaichìnna ṭha lehzual a awm theihna tura ram pahnih Home secretary-te Dhaka, Bangladesh-a an inbiaknaa ram pahnih inrina state leh district-a district magistrate leh superintendent of police-te'n inbiakna nei se tia thu an lo dah tawh bawhzuina a ni.

Meeting-ah hian Indo-Bangladesh border fencing chungchang te, ramria insumdawn tawnna te, ralthuam leh damdawi tawlhrûk do chungchang, dan loa ramri kân tihtawp dan tur te, ram pahnih insumdawn tawnna tur te, inlaichinna ṭha zawk a awm theih nana thil pawimawh hrang hrangte leh, inbiakpawh tawnna ṭha a awm theih nana hmalak dan turte sawiho a ni.

Inbiaknaah hian Mizoram aṭangin Bangladesh ram rîtu district pathum - Mamit, Lunglei leh Lawngtlai district aṭangin DC leh SP te, Home department aṭangin addl. secretary Lalbiakzama leh OSD David H Lalthangliana te, BSF sector hqrs commandant, Revenue department aiawh, CADC aiawh leh Lungleia SIB aiawhte an tel.

Bangladesh aṭangin India ram rîtu district pahnih - Bandarban leh Rangamati district-a DC leh SP te, Revenue aiawh, Border Guard Battalion aiawh leh sorkar mi pawimawh dangte an tel a ni.