MNF-te'n khawpui hrang hrangah kawng zawh

Nimin khan MNF party huaihawtin Mizorama district headquarters tinah leh khaw dang ṭhenkhatah 'Mipui tlavang hauhna kawngzawh' neih a ni a; buaina leh harsatna lian tham thleng a awm lo. Kolasib leh Mamitah erawh chuan kawng zawh loin, sorkar thil tih an duh lohna leh demna thu ziak (poster) an tár a ni.

Lungleiah chuan Ramthar Venga AOC pump aṭanga Kikawn thleng an zawh a; kawng zawh ṭannaah MNF sub-headquarters treasurer KT Nghawra'n thu a sawi. MIZOFED office kawtah sub-headquarters president Joseph Lalzawmliana'n thu a sawi a, Kikawnaah vice president Lalsawmkima'n thu a sawi leh bawk.

Saihaah chuan New Saihaa Vety kâwn aṭangin Bazar traffic point thleng kawng an zawh. Saiha district MNF president HC Lalmalsawma Zasai-in kawng zawh ṭanna inkhawmah thu a sawi a, general secretary V Sangmuana'n thu a sawi bawk. MNF thawhpui Maraland Democratic Front (MDF) chu kawng zawhnaah hian an tel lo a, mahse kawng zawh chu an thlawp thu, MDF president M Laikaw chuan a sawi.

Lawngtlaiah chuan Chanmari aṭanga Lawngtlai Bazara Areopagi thleng kawng zawh a ni. Kawng zawh ṭannaah LADC-a MDC B Lalduhsaka'n thu a sawi a, Areopagi-a inkhawmah Lawngtlai district MNF president Lalramliana Colney-in thu a sawi thung.

Serchhipah chuan AOC aṭanga Bazar thleng kawng zawh a ni a; kawngzawh ṭan hmaa inkhawmah an party adviser C Lalramzauva'n thu a sawi a; kawng zawhnaah Lalrinawma, MLA leh minister hlui H Rammawi ten thu an sawi bawk.

Champhaiah chuan Joint MNF Block huai­hawtin Champhai Vengsang aṭanga Bethel Veng kâwn thleng kawng an zawh. Dawrkai kâwn leh DK Traffic Point-ah MNF gen.hqrs-a general secretary Lalrintluanga Sailo-in thu a sawi a, Bethel kâwnah gen.hqrs-a secretary Ropuia'n thu a sawi.

Kolasib-ah chuan kawng zawh loin, Diakkawn­ah vantlang inkhawm neih a ni a, MNF vice president Dr R Lalthangliana'n thu a sawi. Inkhawm zawhah poster an tár nghal a ni.

Tlabungah chuan Zodin kâwn aṭanga Bazar Bungkawn thleng kawng zawh a ni a, hmun hrang hrangah Aizawl aṭanga thu thawn chhiar chhuah a ni.

Khawzawla kawng zawhnaah chuan MNF adviser Lalsawmzuala leh hruaitu dangte'n thu an sawi a, poster an tár bawk.