BCM 2015-16 budget Rs. 63,21,55,600

Baptist Church of Mizoram (BCM) Assembly hnuaia rorelna sang ber, Assembly Executive Committee meeting chu January 21-22 chhung khan Sap Upa leh Pu Buanga Hall, Serkawnah neih a ni a; kum 2015-16 BCM budget atan Rs. 63,21,55,600 an ruahman.

BCM Assembly Executive Committee meeting hi BCM president Rev. H Sangchema'n kaihruaiin, general secretary Rev. H Lianngaia’n report a pe a; rorel palai (committee member) 167 an kal.

BCM Executive Committee hian Finance Committee-in kum 2015-16 chhunga budget atana an ruahman, Rs. 63,21,55,600 chu an pawm a, BCM Assembly-ah pawmpui turin thlen a ni ang. Budget hi kum 2014-15 aiin Rs. 7,05,29,300 (12.56%)-in a sang zawk. Budget-ah hian, kohhran thawhlawmah Rs. 39,95,16,700 ruahman niin, kum hmasa aiin Rs. 4,74,64,800 (13.48%)-in a tam a; department thawh chhuah tura ruahman chu Rs. 23,26,38,900 niin, kum hmasa aiin Rs. 2,30,64,500 (11.01%) a tam zawk a ni.

BCM meeting chuan, probationary pastor thawk lai pangate chu kumin BCM Assembly-a nemngheh turin a pawm a; kum 2008-a BCM Assembly-in pastor nupui sorkar hnathawk mekte kum 2015 aṭanga báng tura thu a lo dah tawh chu tihdanglam ni se, tih rawtna chu Assembly-a ngaihtuah turin an pawm bawk.