Lal Thanhawla'n Assam chêt dan a dem
Mizoram Pradesh Congress Committee (MPCC) president Dr Lal Thanhawla chuan Mizoram leh Assam ramria buaina thleng mek chungchangah nimin khan thuchah a tichhuak a; thil thleng chuan ramri chinfel kawngah nghawng ṭha a neih a beisei thu leh, Assam lam chêt dan chu a dem thu a tarlang.
Dr Lal Thanhawla chuan, tun hnaia Mizoram leh Assam ramria buaina hrang hrang thlenga Mizoram mipui ṭanrualna chu ropui a tih thu sawiin, "Hei hian ramri chinfelna kawngah nghawng ṭha tak a neih ka beisei. Mizoram hi Zo hnahthlak zawng zawngte tan Jerusalem a nih angin, ramri humhalh hi kan hnam zahawmna leh himna tur a ni tih i hre reng ang u," a ti.
Mizoram leh Assam ramri chu awlsam taka chinfel theih a ni lo tih sawiin Lal Thanhawla chuan, "Mizoram mipui, kohhran, tlawmngai pawlte leh political party zawng zawng kan ṭanrual a ngai a, dinna inang, policy thuhmun, kan zavaia kan pawm tlàn theih tur kan neih a ngai tawh tak zet a ni," a ti a; Mizoram sorkarin ramri humhalhna tura hma a laknaah party leh páwl sawi loa mipuite'n sorkar an ṭawiawm zel a duh thu a sawi.
MPCC President chuan, ramri humhalhna kawnga ramri depa khua zawng zawngte inpekna a ropui a tih thu sawiin, ram leh hnam chhanna thila hliam tuarte chu dam leh thuai turin duhsakna a hlan a, "Ramria Assam sorkar chêtnate hi ka dem a, state sorkar meuhin state dang châk lakna kawngpui a dang chat duh phei hi chu hriatthiam theihah ka ngai lo. Mizoram sorkar pawhin ramria Assam chêtnate hi sorkar laipuiah nasa taka dodalna a lantir ngei ka beisei," a ti.
Dr Lal Thanhawla chuan, ramria buaina avanga Mizoram chhunga hnam dangte lakah tharum thawh lo turin Mizoram mipui a ngen bawk.