Buhchangphai Ramthar Zauah YMA flag târ a ni

Central YMA, Kolasib sub-headquarters YMA leh Serlui group YMA hruaitute chuan nimin khan Buhchangphai Ramthar Zau an tlawh a; Ramthar Zau chu Mizoram chhung ngei a ni tih entir nan leh YMA-in hma a la zui zel dawn a ni tih lantir nan YMA flag an zár.

CYMA president Lal-biakzuala chuan, Mizoram ṭhenawm ramte'n Buhchangphai Ramthar Zau chu an rawn chuhpui avangin CYMA chuan Mizoram chhung ngei a ni tih puang tura kal an nih thu a sawi a, "Hun kal zelah pawh helai hmun hi kan ram ngei a ni tih kan hria a, kan humhalh zel dawn a ni," a ti.

Buaina a awm vanga Ramthar Zaua duty IR police-te, nimin lama an hmun lama an insaseng (withdraw) chu an hriatthiam loh thu sawiin, Lalbiakzuala chuan, "Thlabára mi an awm laia IR police-te an withdraw hi ram venghim zo loah an ngaih theih mai a hlauhthawnawm ta ni," a ti a; CYMA chuan IR-te'n Buhchangphai chu la veng zui zel se an duh thu a sawi.

Tarlan tawh angin, nikum April 27 leh 29 khan Ramthar Zaua Kapzuala leh RK Laldawng­liana-te leilet enkawltute chu Assam Police leh Forest mite'n thlam an tihchhiatsak a, April 30, 2014-ah Home minister R Lalzirliana'n tlawh nghalin, in chhiate chu hnatlanga sak ṭhat a ni. January 19, 2015 khan Assam Police leh Forest mite'n Ramthar Zaua leilet enkawltute chu chhuak tur leh an thlámte ṭhiat turin an rawn ti leh a ni.