Khawthlir

Thisen pe
ICFAI University, Mizo­ram chuan nimin khan Republic Day lawm nan an campus-ah blood donation camp an buatsaih a, Aizawl Civil Hospital tan thisen unit 40 an pe a, a petute mipa 32 leh hmeichhia pariat an ni.

National Voters Day
January 25 hi National Voters Day a ni a, Mizo­ramah chuan Pathianni a nih avangin vawiin hian Vanapa Hall-ah chawhnu dar 2-ah hman a ni ang. GAD chuan, Mizoram sorkara gazzetted officer zawng zawngte chu National Voters Day hmanaah tel turin a hriattir a ni.

NLUP sem
Agriculture department hnuaia NLUP ṭanpuina dawngtu mi 289-te hnen­ah nimin khan Mamit Chhimveng YMA Hall-ah Lalrobiaka, MLA-in
ṭanpuina pawisa a hlan.

KTP Conference
Kristian Ṭhalai Pawl-te chuan nizan khan Mizoram pumah leh state pawnah bial conference an hmang ṭan. KṬP bial conference-ah hian vawiinah rorel inkhawm neih a ni dawn a, nakzanah a ṭiak ang.

Kum 5 atan pe
State Transport Authority (STA) chuan thu­chhuah siamin, Motor Vehicles Act 1988 tlawhchhana STA-in permit a pek (Section 87 hnuaia temporary permit leh section 88 (8) hnuaia special permit a pek tel loin) chu MV Act 1988 Section 81-in a sawi angin, kum nga atan pek a ni tawh dawn tih a tarlang. Thupek hi January 1, 2015-ah hman ṭan a ni.

Tla hlum
Nunmawii (83) m/o V Ramenga, Armed Veng chu Ningani chhun khan an in aṭangin a tla a, damdawi-in panpui a nih hnuah a hliam tuar loin Ningani zan dar 7:30 vel khan a thi.

Hmasawnna tur sawiho
State Level Cooperative Society leh institution hrang hrang aiawhte chuan, nimin khan Apex Bank head office-ah Cooperative Apex Bank tihhmasawn dan tur an sawiho.