HIV/AIDS dona leh a veite enkawlnaah theihtawp ka chhuah ang: CM Hawla

India hmarchhak biala HIV/AIDS dona chungchang sawihona, NE Strategic Action Plan Consultative Meeting, Hotel Regency conference hall-a neih chu January 22 tlai khan chief minister Lal Thanhawla'n a khâr a; HIV/AIDS dona leh a veite enkawlnaah theihtawp a chhuah tur thu a sawi.

Chief Minister chuan, tun hnaiah HIV dona tur leh a veite enkawlna tur sum dawn ṭhin bakah, thisen ip, testing kit, OST leh anti retroviral therapy (ART) dawn ṭhinte a tlakhniam nasat thu a sawi a, "Kan harsat phah hle a ni," a ti a; harsatnate chu hriatpui a, chinfelsak thuai turin NACO leh Union Health Ministry aiawha tel officer-te a ngen.

Lal Thanhawla chuan, HIV/AIDS do turin a hluarna bik Manipur, Nagaland leh Mizoramahte zâm loa thapui thawh a ṭul thu a sawi a; ṭan­­rualna nen thawhho a nih chuan HIV/AIDS chu do hneh theih a nih thu sawiin, "Chief Minister ka nihna angin a dona kawngah leh a veite enkawlnaah theihtawp ka chhuah ang," a ti.

NACO additional secretary Dr NS Kang chuan, hmarchhak bika HIV darh zau tur venna atan ruahmanna thar (new concept) hman a nih tur thu a sawi.