E&F-in ramngaw humhalh nan NGO-te Kum 7 chhungin Rs. 3,45,62,110 a pe

Environment & Forest department chuan kum 2008-09 aṭanga sorkar kum kal mek, 2014-15 thlengin pawl hrang hrangte hnenah ramngaw leh nungchate humhalhna kawnga hmalakna atan Rs. 3,45,62,110 an pe tawh a; heng zinga Rs 20,91,970 hi Central YMA kutah a lut. Hemi kum chhunga NGO ṭanpuina tura sum ruahman chu Rs. 4,73,07,800 a ni.

RTI Act hmanga zawhna E&F SPIO-in a chhan danin, nungcha, thing leh maute humhalhna kawnga hma­lakna atan hian Finance Com­mission grant, Intensification of Forest Management (IFM) leh Com­pensatory Afforestation Fund Management and Planning Authority (CAMPA) hnuaiah NGO-te hnenah ṭanpuina pek ṭhin a ni a; chung atna sum mamawhte chu work programme leh annual plan of operation-ah dah ṭhin.

E&F chuan kum 2008-09 leh 2014-15 inkarah nungchate leh ramngaw humhalhna kawnga hmalakna atana NGO-te hnena ṭanpuina tur sum an dah zat chu - CAMPA hnuaiah kum 2013-14 chhungin Natural Forest Management (NFM)-ah Rs. 46,39,800 leh Awareness/Extension Activities-ah Rs. 21,00,000 dah a ni a, kum 2012-13 chhungin Awareness atan Rs. 20,00,000 dah a ni. CAMPA hnuaia sum ruahman zawng zawng chu Rs. 87,39,800 a ni.

Nungchate leh ramngaw humhalhna kawnga hmalaknaa NGO-te ṭanpuina atan hian Finance Commission aṭanga sum hmuhte chu kum 2010-11-ah action plan-ah dah ṭan a ni. Kum 2010-11 ah Rs. 1,00,00,000, kum 2011-12 ah Rs. 55,00,000, kum 2013-14 ah Rs. 1,35,00,000 leh 2014-15 ah Rs. 95,68,000 dah a ni a; a vaiin Rs. 3,85,68,000 a ni. CAMPA leh Finance Commission aṭanga sum dah zawng zawng chu Rs. 4,73,07,800 a ni.

Hetih lai hian, E&F department chuan kum 2008-09 leh 2014-15 inkara ramngaw leh nungcha hum­halh­naa hma latu NGO-te hnenah Rs. 1,02,24,110 a pe tawh. Finance Commission aṭanga grant hmuh leh Intensification of Forest Management (IFM) aṭangin Rs. 26,62,910 an pe a; CAMPA aṭangin Forestry & Wildlife Extension Activities hnuaiah Rs. 29,21,400 leh Natural Forest Management aṭangin Rs. 46,39,800 an pe a ni.

Finance Commission leh IFM hnuaia sum pekte hi awareness campaign, ram kâng venna, advertisement leh thil dang atan pek chhuah a ni.

Kum 2008-09 ah chuan Bukpui YMA hnenah Rs. 22,000, Zohnuai YMA-ah Rs. 49,900, Hlimen YMA-ah Rs. 2,500, Central YMA-ah Rs. 38,220, Khatla YMA-ah Rs. 4,000, Serchhip sub-hqrs YMA-ah Rs. 1,00,000, CYMA-ah Rs. 3,50,000, Bawngkawn YMA-ah Rs. 15,000, Chaltlang YMA-ah Rs. 15,000, CYMA-ah Rs. 3,00,000 a ni. A vaiin Rs. 8,96,620 a ni a; Central YMA bikah Rs. 6,88,220 a lut.

Kum 2009-10 chhungin IFM hnuaiah hian Mulbu 'L' YMA hnenah Rs. 5,000 leh CYMA-ah Rs. 2,00,000 pek a ni a, a vaiin Rs. 2,05,000 a ni. Kum 2010-11 chhungin CYMA-ah Rs. 3,02,500, Lunglei Sub-Hqrs YMA-ah Rs. 63,360, Kolasib Sub-Hqrs YMA-ah Rs. 2,50,000, Champhai Sub-Hqrs YMA-ah Rs. 2,50,000 pek a ni a; a vaiin Rs. 8,65,860 a ni.

IFM hnuaiah vek kum 2012-13 chhungin Central YMA hnenah Rs. 3,01,250 pek a ni a, kum 2014-15 chhungin Central YMA hnenah tho Rs. 3,00,000 pek a ni bawk. IFM hnuaia kum 2008-09 aṭanga 2014-15 thlenga E&F-in sum a pek zat chu Rs. 17,91,970 a tling. Heng bakah hian Forest Division kaltlangin YMA branch ṭhahnem tak hnenah kângmei chhuak tur vênna, meilam sialna leh lo hâl hnatlanna atan ṭanpuina pek a ni bawk.

CAMPA hnuaiah kum 2013-14 aṭangin NGO-te hnenah ramngaw leh nungchate humhalh kawnga hmalakna atan ṭanpuina sum pek a ni a; CAMPA hnuaia Forestry & Wildlife Extension Activity tihah kum 2013-14 ah Rs. 9,00,000 leh 2014-15 ah Rs. 20,21,400 an pe chhuak. CAMPA-ah vek hian Natural Forest Management hnuaiah kum 2014-15 chhungin Rs. 46,39,800 an pe chhuak a ni.

CAMPA hnuaia kum 2013-14 chhunga sum pekte chu - ASEP Rs. 2,00,000, MZP Rs. 1,50,000, MHIP Rs. 1,50,000, Centre for Environment Protection Rs. 1,00,000, YHAI Rs. 1,00,000, Laipuitlang YMA Rs. 50,000 leh Khawbung YMA Rs. 1,50,000 an ni.

Kum 2014-15 chhunga sum pek tam zualte chu - Central YMA Rs. 5,00,000, Centre for Environment Protection Rs. 3,00,000, ASEP Rs. 3,80,000, MHIP Rs. 3,00,000, MZU Rs. 3,00,000, Zohlim Film Industry Rs. 1,00,000 leh ROAR TV Rs. 1,00,000 te an ni.

Natural Forest Management hnuaiah erawh chuan ramngaw leh nungcha humhalh kawnga hma la tura pawl din (NGO)-te sum pek a awm lo a, thingtlanga V/C, YMA, MUP leh MHIP-te pek an ni.

Heng bakah hian, 13th Finance Commission hnuaia Ensuring People's Participation Scheme aṭangin NGO-te hnenah kum thum chhungin Rs. 2,43,38,000 pek chhuah a ni a, V/C leh YMA-te hnenah pek a ni tlangpui. Kum 2010-11 chhungin Rs. 1,00,00,000, kum 2011-12 chhungin Rs. 33,38,000 leh kum 2013-14 chhungin Rs. 1,10,00,000 an pe a ni.

E&F department chuan, ṭanpuina an pek pawlte chu an sum hman dan report tura tih ṭhin an nih thu a tarlang a, "Tun dinhmunah sum hmang ṭha lo NGO an awm hriat a ni lo," a ti.