MNF vice president-in Assam-Mizoram Inrinaah police post siam thuai tul a ti

MNF vice president Dr R Lalthangliana chuan, Buhchangphaia Environment & Forest department-in beat post a siam, enkawl zui loh leh luahtu awm loa rawp chhe vek tawh chu thuam ṭhat leh a ṭul thu a sawi a, Assam leh Mizoram inrîna bulah police outpost a rang lama siam ni se a duh thu a sawi bawk.

Dr R Lalthangliana hian January 22 chawhnu khan Buhchangphai Ramthar Zaua Assam sorkar mite'n Mizo leilet enkawltute an vauna hmun a tlawh a; Assam mite chet hnua Mizoram sorkarin police a dahte chu tlem a tih thu leh leilet leh huan neitute tan thlamuanpui tham an ni loa a hriat thu a sawi.

MNF vice president chuan, Mizoram leh Assam ramria buaina awm ṭhinah boruak chhe zawk leh ṭul loa inkahna a thlen loh nan thuneitu sangte'n dawhkan khat kîla chinfel dan an sawiho thuai ṭul a tih thu a sawi a; ramri chungchang chu politics thila thangṭhat hlawh tumna chi ni loa a hriat thu leh, Mizoram sorkar mai bakah Mizo mipuite'n mutmawh hnarmawha an neih a ṭul thu a sawi bawk.