Zirtiri College-in SBA an bawhzui

Zirtiri Residential Science College chuan nimin khan Swachh Bharat Abhyan bawhzuiin Ramhlun Sports Complex khelmual leh a chhehvel thenfai hnatlang an nei a, parliamentary secretary Hmingdailova Khiangte-in a hawng.

Hmingdailova Khiangte chuan, faina kawnga ṭhalai leh zirlaite'n ṭan an la chu lawmawm a tih thu sawiin, "Faina leh thianghlimna hi lak hran theih a ni lo. Zûk leh hmuam tih loh hi faina kawng pakhat a nih rualin, thianghlimna a ni bawk," a ti.

Zirtiri College principal Lalṭanpuia chuan, Swachh Bharat Abhyan hnuaiah zirna-inte chu vantlang hmunte leh hmun pawimawhte tifai tura ngen an nih angin, Ramhlun Sports Complex tifaiin bul an ṭan tih a sawi a; Swachh Bharat Abhyan chu an college-in an kalpui zel dawn tih a sawi bawk.

Zirtiri Residential Science College zirlaite leh zirtirtute hian RSC khelmual leh mipui ṭhutna leh sir vela hnim leh bawlhhlawhte an thianfai a, an hâl ral nghal a ni.