Minister-in Eklavya School sak mek a tlawh

Social Welfare minister PC Lalthanliana chuan nimin khan Serchhip Kawlri tlanga cheng vbc.12 sênga Eklavya Model Residential School (EMRS) sak mek a tlawh a; April 2015-a class ṭan hman ngei tura inpeih turin PWD, Social Welfare department hotute leh contractor-te a hrilh.

PC Lalthanliana chuan, Eklavya School chu mirethei leh chhumchhiate'n zirtirna changkang leh belhchian dâwl an hmuh theihna tura sorkar laipuiin rua­hmanna a siam a ni tih a sawi a, "Eklavya School hi Lungleiah changtlung taka din a ni tawh a, kum thara Eklavya Model Residential School, Saiha district-a din tura chak taka hma lak leh mek a ni," a ti.

Minister zawhna chhangin, PWD executive engineer Lalzarliana chuan, April 2015-a class ṭan hman ngei tura an inpeih dawn thu a sawi a, hna thawh tur rip zualpui chu zawhfel vek a nih tawh thu a sawi.

Social Welfare deputy director Vanlalnghaka sawi danin, Serchhipa EMRS-ah hian April 2015 aṭangin Class VI, VII leh VIII ṭan nghal tura ruahman a ni a; kum tin class thar hawn belh zel a ni ang a, Class XII thleng zir theihna tura siam tum a ni.

EMRS hi Scheduled Tribe naupang rethei leh chhum­chhiate'n a thlawna lehkha an zir theihna tur a ni a, hostel a awm nghal ang. Ministry of Tribal Affairs-in a sakna tur sum a pe a, tunah hian Phase-I atan cheng vbc. 12 ruahman a ni.