Beng natna leh enkawl dan zirho

National Programme for Prevention and Control of Deafness (NPPCD) hnuaia medical officer-te pualin nimin khan Health directorate conference hall-ah training buatsaih a ni a; district pathum – Aizawl East, Aizawl West leh Lunglei aṭangin ENT specialist pasarih leh medical officer 31 an tel.

Training-ah hian beng lam thiam bik doctor, Dr Thanchungnunga, Dr R Lalnuntluanga leh audilogist Lalrinfeli ten beng hriselna leh beng lam natna enkawl dan te, bengdár chungchang te, beng ná enkawl ṭhat loh vanga bengngawng awm theih dan leh beng­ngawng enkawl dante an zirtir a ni.

NPPCD hi kum 2007-ah India ram hmun ṭhenkhatah hman ṭan a ni a, Mizoramah chuan August, 2014-ah bul ṭan niin, Aizawl East, Aizawl West leh Lunglei district-ahte kalpui mek a ni. NPPCD-in a tum ber chu - beng natna hrang hrang a hma thei ang bera hmuh chhuaha enkawl dam a ni.