National Voters Day hman a ni
Nimin, January 25 kha National Voters Day vawi ngana a ni a, Pathianni a nih avangin Mizoramah chuan Inrinni khan hmun hrang hrangah hman a ni.
National Voters Day hi Election Commission of India (ECI) din champhaah hman ṭhin a ni a; Aizawlah chuan tlai dar 2-ah Vanapa Hall-ah hman niin, chief electoral officer Manisha Saxena chu khuallian a ni.
Manisha Saxena chuan, kum 1950-a ECI din a nih aṭanga tun thlenga ECI-in India ram puma inthlan pawimawh tak tak hlawhtling taka a huaihawt dante a sawi a, "India ram hi khawvela mipui rorelna democracy lian ber leh hlawhtling ber a ni. India ram zau taka inthlanna hlawhlting tak neih a nih theihna chhan chu - mipui, official leh mawhphurtute thawhrimna leh thawhhona ṭhat vang a ni," a ti.
Mizoram CEO chuan, electoral roll special summary revision 2015 neih zawh tak chungchang sawiin, kum tling thar mi 15,930 thun thar an nih thu a sawi a; vote nei tharte chu ram inrelbawlnaa an mawhphurhna pawimawhna hriaa inthlanah ṭha taka vote thlak ṭhin turin a chah a ni.
Vanapa Hall-a National Voters’ Day hmannaah hian sorkar official, political party leh NGO aiawh leh sikul naupangte an tel a; chief election commissioner HS Brahma thuchah chhiarchhuah a nih bakah, joint CEO FJ Liantluanga leh Mizoram People Forum president Rev. Lalrinmawia ten thu an sawi. Electoral roll-a thun thar zinga mi mi 10 hnenah EPIC hlan nghal a ni.
Electoral roll ennawnnaa Mizoram puma hna thawk ṭhaa thlante hnenah lawmman hlan a ni a; Aizawl district-a Best BLO-ah Rosangzuali, Mission Veng-II, kum 2014 Lok Sabha inthlana vote tlak ṭhatna ber district - Serchhip district leh vote tlak ṭhatna ber constituency - Hrangturzo leh, roll-a ziah luh thar tamna ber Palak bialte hnenah lawmman hlan a ni.
National Voters Day hi Saihaah chuan DC conference hall-ah hman a ni a; Election officer HD Lalpekmawia'n kaihruaiin, Saiha addl. DC Beila Khithie khuallian a ni. Saiha DC Andy Lalfakzuala Varte-in voter thar ṭhenkhatte hnenah EPIC a hlan.
Champhaiah chuan DC leh district election officer Sangdingliana hoin DC conference hall-ah hman a ni a, Voters Day puala thutiam sawi rual a nih bakah, BLO ti ṭhate hnena lawmpuina hlan a ni. Champhai district-ah hian Assembly constituency panga, voter 79,550 (hmeichhe 39,940 leh mipa 39610) an awm.
Serchhipah chuan DC conference hall-ah hman a ni a, Serchhip DC leh district election officer Juhi Mukherjee khuallian a ni. DC chuan, Serchhip mipui zinga 62.1% chu vote nei an nih thu a sawi a, "Hei hi Mizoram pumpui aṭanga teh pawhin a sang a, thil lawmawm tak a ni," a ti. Serchhip district-a BLO thawk ṭhate hnenah lawmman pek a ni a, thutiam sawi rual a ni bawk.
Mamitah chuan LAD conference hall-ah hman a ni a, Mamit DC K Lalthawmmawia khuallian a ni. DC leh DEO chuan, Mamit district-a vote nei tharte chu ram inrelbawlnaah chanvo an nei ve tawh a ni tih inhria a, vote thlak chu an mawhphurhna a ni tih hre turin a chah. Mamitah hian addl. DC Lalbiaksangi'n thuchah a chhiar chhuak a, Voters’ Day thutiam an sawi rual a ni. Mamit district-ah hian Assembly constituency pathumah vote nei thar mi 2,751 awmin, vote zawng zawng chu mi 59,991 an ni.
National Voters’ Day hi East Lungdarah pawh YMA Rûnah hman a ni a, East Lungdar BDO C Laltleipuii chu khuallian a ni.