AMWF-in hmeichhe seat hauh vangin lawmthu an sawi

All Mizoram Women Federation (AMWF) chuan, Mizorama V/C inthlanah hmeichhiate tana seat hauhsak a ni ta chu lawmawm an tih thu an sawi a; hmeichhe tana seat hauh a nih tak avang hian, Mizo hmeichhiate chu khawtlang hruaitu tlak ni thei tura ṭang turin an chah.

AMWF hruaitute hian Inrinni khan Aizawl Press Club-ah thuthar thehdarhtute an kâwm a; The Lushai Hills District (Village Councils) (Amend­ment) Act 2014 hman a nih tak avanga lawm­thu an sawi rualin, Aizawl Municipal Council hnuaia local council-ah hmeichhe tana seat reserva­tion a awm theih nan hmalak mek a nih avanga an lawm thu an sawi a ni.

AMWF chuan, V/C inthlanah hmeichhiate'n an chuh ve ngei a ngaih tawh avangin hmeichhiate chu ṭang turin an fuih a, "Hmeichhiate tling lo anga kan inngaih ṭhinnate i bànsan ang u," an ti a; hmeichhiate chu insit loa pên chhuak tur leh, lehkhathiamte leh mi ṭha tak takte chu ding chhuak turin an ngen.

AMWF president Dr Jane Ralte chuan, The Mizoram Municipalities (Amendment) Act, 2009 Section 13(10)-in a phût angin, hmeichhiate tan chairman post reserve an duh thu a sawi a; The Mizo Marriage, Divorce and Inheritance Property Bill, 2014 chu a taka hman thuai an duh thu leh, Panchayat Mahila Sakti Abhyan (PMSA) Core Committee-in kum 2008-a Charter of Demand an lo thehluh tawhte chu tihhlawhtlin ni se an duh thu a sawi bawk.