Khawthlir

Leprosy Sunday
Baptist Church of Mizoram chuan nimin khan phár pual Pathianni (Leprosy Sunday) an hmang a, tualchhung kohhran tinin chawhma inkhawmah Leprosy Sunday hi an hmang a, thupui chu 'Heng ka unau tê berte zinga mi pakhat chunga in tih chu ka chunga ti in ni,' tih a ni.

Current-in man
Inrinni zing dar 7 vel khan Vanlalchaka (55), West Phaileng Dinthar chu electric current-in a man a, Aizawl panpui a nih laiin kawng lakah a thi. Thu dawn danin, R Vanlalchaka hian an in sak laiah tui a pe a, an in rel chunga electric hrui chu a lua tauh palhin, current-in a man a, a hnuai chhuatah a tla thla a ni.

Meizu man
Lawngtlai District Anti-Tobacco Squad chuan Inrinni khan zing kárah Lawngtlai khawpuia Chawngte pêng leh chawhmeh bazarpuiah COTPA dan bawhchhia an awm leh awm loh an vâi a, phal lohna hmuna mei zu mi 32 an man. Mei zu an mante hi dan angin pawisa an chawitir nghal zel a, Inrinni zinga an mante pawisa chawi tling khawm chu Rs. 2070 a ni.

Lehkhabu pe
Dr.Zohmangaiha chuan a lehkhabu ziah, Watchman Nee (Thilsiam Thuruk) tih chu MJA public library-a dah a tan a pe a, a chungah MJA in lawmthu an sawi.