Kum 2014-ah foreigner 921 rawn zin

Kum 2014 chhunga ram dang mi (foreigner), Mizorama rawn tlawhtu sorkarin a chhinchhiah zat chu mi 921 an ni a; an zingah hian USA aṭanga rawn kal an tam ber.

CID (Special Branch) hnuaia Foreigner Registration Office chhinchhiah danin, January-December 2014 chhunga ram dang khualzin, Mizoram rawn tlawhtute zingah America'n tam berin, mi 226 an rawn zin a; Britain miin dawtin, British 104 an rawn zin a ni.

Kum 2014 chhunga Mizorama rawn zin ram dang mi dangte chu - Australian 66, Bangladeshi 68, South Korean 29, German 35, Israeli 25, Canadian 35, French 23, Japanese 67, Thailand mi 22, Nigerian 22, Myanmar mi 19, Singapore mi 17, Italian 12 bakah, ram dang 44 aṭanga lo kalte an ni. Foreigner rawn zin zingah, March thlaa rawn zin an ṭhahnem ber.

Tun hma chuan ram dang mite tan Mizorama lut turin sorkar laipuia Home Ministry aṭangin Protected Area Permit (PAP) lak a ngai ṭhin, Kum 2011 aṭang khan Union Home Ministry chuan PAP chu kum khat chhung zel atan a thlahdul a; Afghanistan, Pakistan leh China mite tih loh, ram dang zawng tan chuan PAP lak a ngai tawh lo.

PAP hi lak ngai lo mah se, ram dang mi rawn zinte chu Mizoram an rawn thlen aṭanga darkar 24 chhungin Foreigner Registration Office-a in report tura tih an ni thung a; an inziak lut lo a nih chuan man theih an ni.