Covid-19: Mizoram dinhmun Covid-19 kai tawh zat - 1,040

September 2, Nilaini khan Mizoramah Covid-19 vei mi 20 hmuh chhuah a ni a, Mizorama hripui vei hmuh tawh zawng zawng chu mi 1,040 an ni. Hetih lai hian, nimin khan Covid Care Centre (CCC) pahnih aṭangin mi 10 chhuahtir an ni.

Nilainia Covid-19 vei hmuh chhuahte chu ZMC Covid-19 laboratory-a RT-PCR hmanga swab sample 612 endik zinga mi 17 leh Rapid Antigen Test hmanga Vairengte checkgate-a endik aṭangin mi pathum an ni a; Vairengtea hmuh chhuahte hi nimina Vanglaini chhuakah tarlan a ni tawh. Lunglei Civil Hospital laboratory-a endik mi pahnih zingah hripui vei an awm lo.

Mizorama Covid-19 kai hmuh chhuah tawh mi 1,040 zinga mi 662 (63.65%) chu chhuahtir an ni tawh a, mi 378 (36.35%) an la chhuak lo. La chhuak lo zingah hripui vei tawh lo eng emaw zat an awm bawk.