Vawiinah VC 8 leh LC 22-ah Inthlan buatsaih a ni dawn

Vawiin hian village council pariat leh local council 22-ah inthlan a ni dawn. State Election Commission (SEC) chuan VC pathum leh LC pangaa inthlanna tur thupek nimin khan a tichhuak leh a, local council dang pahnih erawh chu an la inthlang dawn lo.

SEC-in vawiina inthlang tura a tih, nimina hriattirna a tihchhuahte chu, VC-ah Hualngohmun, Kelsih leh Melriat te, LC-ah Bawngkawn, College Veng, Mission Veng, Nursery Veng leh Ṭhuampuite an ni.

Vawiina VC leh LC inthlan turah hian, zing dar 7-ah vote thlak hun hawn a ni ang a, tlai dar 5 thleng vote thlak theih a ni ang. Vote tlate chu tlai/zanah chhiar nghal tur a ni.

Tarlan tawh angin, August 27, 2020-a Mizoram district pakuaa VC/LC inthlanpuiah Covid-19 léng avangin SEC chuan VC pariat leh LC 24-te chu inthlang ve rih lo turin a ti a; chu'ng khua leh veng zinga VC panga leh LC 17-te chu September 4, vawiina inthlang turin SEC chuan September 2, Nilaini khan hriattirna a tichhuak a, VC pathum leh LC pasarih an la tel lo.

SEC chuan nimin khan hriattirna a tichhuak leh a, VC pathum leh LC pangate chu vawiina inthlang turin a ti leh ta a ni. Hetih lai hian, August 27-a inthlang thei lo dang, local council pahnih - Chaltlang Lily Veng leh Ramhlun South-te chu inthlang tura tih an la ni ve lo a; Ramhlun South hi containment zone-a puan mek a la ni a, Chaltlang Lily Veng erawh containment zone-a puanna hlih a ni tawh.