Republic Day ropui taka lawm a ni

India Republic Day vawi 66-na chu nimin khan ram pumah ropui taka lawm a ni a, Mizoramah pawh khawpui hrang hrangah lawm a ni. Aizawlah chuan Lammualah Governor Dr. Aziz Qureshi hoin hman a ni a; Larsap chuan Mizoram sorkar hmalakna leh hlawhtlinna hrang hrangte a sawi.

Aizawla Republic Day hmanna hi zing dar 9-ah ṭan a ni a, Larsap chuan hnam puanzar a pawt pharh a, mipuite chibai a bûk hnuah parade contingent 27-te'n hnam puanzar chibai an bûk a chháng.
Dr. Aziz Qureshi chuan, Mizoram mipuite chu Republic Day duhsakna hlanin, India Constition-in a ken, democracy rorelna kalphung ropui tak chu humhalha tichak turin mipuite a sáwm a, "He ni ropui takah hian zahawmna, muanna, hmuingilna leh hlimna nen mi tin kan chênho theih nan Mizoram tana in theihtawp chhuah ṭheuh turin ka sawm che u. Mizo hnam nun mawi tak - rinawmna te, aia upa zahna te, chhelna leh tlawmngaihna vawng nung zel­in, Mizoram hi chawi kang ila, model state kan siam thei ngeiin ka ring a ni," a ti.
Governor chuan, Mizoram sorkar hnathawh leh hmalakna hrang hrang te, hmachawp awm mekte sawiin, hmasawnna tura sorkar hmalakna hrang hrangah sorkar an ṭawiawm avangin tlawmngai pawl, kohhran, mipui leh thuthar thehdarhtute chungah lawmthu a sawi a; remna leh muanna, hmasawnna leh inpumkhatna vawng him zel turin mipuite a chah a ni.
Aziz Qureshi chuan, NLUP chu chak taka kalpui mek zel a nih thu sawiin, "Kumin piah lam thlenga kalpui chhunzawm zel turin Supplementary Plan buatsaih mek a ni," a ti a; Joint Initiative on Eco-System based on Livelihood Promotion in Mizoram kalpui mek a nih thu a sawi.
Governor chuan, thingtlanga kuthnathawktute khaichhuahna turin nasa taka hmalak a nih thu te, sorkarin kawngpui a ngai pawimawh a, kawngpui siamṭhat hna a thawh mek zel thu te, helicopter ṭumna tur helipad 10 siamna turin DoNER aṭangin sum hmuh a nih tawh thu te, kawlphetha lamah chak taka hma lain, thingtlang kilkhawr ber thlengin electric thlun hna thawh mek a nih thu te, Mizoramin medical college a neih thuai dawn thu te, MGNREGS-a job card nei mi 1,94,686-te tan inhlawhna siam a nih thute leh academic session 2015-16 aṭangin sorkar primary school-ah KG-I leh KG-II class dah ṭan a nih dawn thute a sawi.
Larsap chuan, Mizoram hmun hrang hrangah infiamna hmunhma siam mek a nih thu te, Mizorama ration card 2,41,272 awm zinga 2,15,463 (89.30%) chu digitised a nih tawh thu te, Mizoram sorkar sum hmuh tipung tura nasa taka hmalak a nih thu te, Bairabi-Sairang inkar rel kawng thar tur sial mek a nih thute a sawi bawk.
Nimina Lammuala Republic Day lawmnaah hian chief minister Lal Thanhawla, minister te, parliamentary secretary te, MLA te, sorkar officer lian te, zirlaite leh mipui ṭhahnem tak an tel a; parade contingent ti ṭhate leh Republic Day puala hockey tournament-a champion leh pahnihnate hnenah Larsap chuan lawmman a hlan a ni.