R-Day parade-a tiṭha zualte

Nimina Aizawla Republic Day lawmnaa parade contingent 27-te lâm zinga tiṭhate hnenah Governor Dr Aziz Qureshi-a'n lawmman a hlan a; 1st battalion MAP, Pachhunga University College NCC leh Home Missions School-te pakhatna an ni.

Parade-ah hian armed contingent pali zingah 1st Bn. MAP pakhatna an ni a, 1st Bn. CRPF chu pahnihna niin, 3rd Bn. MAP pathumna an ni. Unarmed contingent pasarih zinga Pachhunga University College NCC pakhatna an ni a, Home Missions School NCC leh Ex-Servicemen te pahnihna leh pathumna an ni.

School contingent 13 zingah Home Missions School pakhatna an ni a, pahnihna chu Providence Higher Secondary School niin, Staines’ Memorial School chu pathumna an ni. Anni bakah hian, band party pathum an lam a; parade commander chu CID (Crime) deputy SP Zonunsanga a ni a, CID (SB) deputy SP C Lalruatkima chu second commander a ni.

Republic Day puala hockey tournament-ah mipaah 1st Bn. MAP an champion a, Kawnpui Venglai Sporting Club pahnihna an ni a; hmeichhiaah Kawnpui Venglai Sporting Club an champion a, Zemabawk Hockey Club chu pahnihna an ni.