Khawthlir

Governor at Home
Nimina Lammuala Republic Day hman zawh hnuah, chawhma dar 11-ah Raj Bhavan tualah Governor's At Home neih a ni a; Larsapin a sawm bikte pualin thingpui ruai a buatsaih. At Home-ah hian chief minister Lal Thanhawla, Assembly speaker Hiphei, minister te, parliamentary secretary te, MLA te, sorkar mi pawimawh te, sakhaw hruaitute tlawmngai pawl hruaitute an tel a ni.

Bike chesualah thi
Pathianni zan dar 9:30 vel khan Bazar Bungkawnah bike chesualin, dâwr bang a sú a, bike hnunga chuang KC Lalnuntluanga (22) s/o Chhanhima, Tuithiang, Aizawl chu Aizawl Civil Hospital thlenpui a nih hnuah a hliam tuar loin a thi. Bike khalhtu K Lalhmangaihkima a hliam bawk.

Tuiah tla hlum
John Lalmalsawma (8) s/o David Lalthanliana, Kolasib Hmar Veng chu nimin tlai dar 2 vel khan Ṭumpui V/C tuikhuahah a tla hlum. Kolasib aṭanga thudawn danin, John Lalmalsawma hi a ṭhiante nen tuikhuah­ah hian an chêng a, che­sual­in a tla hlum a ni.

Inbe dawn
Hailakandi Forest Division leh Kolasib Forest Division hotute chu vawiin hian Buhchangphai Ramthar Zau-ah an inbe dawn. Kolasib DFO Lalthlamuana sawi danin, inbiaknaah hian Kolasib leh Haila­kan­di Forest Division huam chin, department-te'n an enkawl mek nia hriat an thlir dun dawn a ni.

CMWA Sports
Calcutta Mizo Welfare Association huaihawtin Kolkata khawpuia Mizote chuan January 24, 2015 khan Salt Lake-ah Kolkata Mizo Sports 2015 an ṭan a, footballer S Malsawmtluanga khuallian a ni. Sports hi nimin khan an chhunzawm a, Mizo infiamna chi hrang hrang leh item dangte hmangin an intihsiak.

Inkaphlum
David Lalpekhlua (12) s/o RC Chuangkima, E. Lungdar chu a nau kum riat miin nimin tlai khan a pa ulhbun-in an inchhung­ah a kap palh a, a ka pawh chhawn loin a thi.