Mizoram pumah Republic Day lawm a ni
Republic Day vawi 66-na chu nimin khan Mizorama district khawpui tinah leh khaw dang ṭhenkhatahte hman a ni a; district khawpuiah chuan district commissioner (DC) leh addl. DC-te'n hnam puanzar pawt pharhin, parade chibai bûk an chhang.
Lungleiah chuan Republic Day hi Ṭhuamluaiah Mualah hman a ni a, khuallian, DC Ashish Madhaorao More chuan sorkar hmalakna hrang hrang leh hmachhawpte a tarlang. Lungleia Republic Day ceremonial parade-ah hian armed contingent pathum, unarmed contingent pali, school contingent 14 leh band party pahnih an awm.
Saiha-ah chuan district playground-ah hman a ni a, khuallian, addl. DC Beila Khiethie chuan, Republic Day chu ram tana ni chhinchhiah tlak tak, ram leh sakhaw intluktlânna rama India siam a nih ni a nih thu a sawi. Saiha-ah hian parade contingent 14 an awm a, paruk chu uniform contingent niin, pariat chu school contingent an ni.
Champhaiah chuan DC Sangdingliana hoin Chhangphut Field-ah lawm a ni a, DC hian parade contingent 22-te'n hnam puanzar chibai an bûk a chhang let. Champhai DC chuan Republic Day puala Champhai khaw chhunga sorkar office-te'n pawisa an thawhkhawm chu Genesareth Home, Emmanuel After Care, TNT Champhai, Metakhen, Shelter Home leh Champhai District Hospital hnenah a sem a ni.
Kolasib-ah chuan Ṭumpui Field-ah hman a ni a, DC Jitender Yadav chuan, India ramin mahni inrelbawlna danpui a neihna ni chu a hlu tak zet tih a sawi. Kolasib-a Republic Day lawmnaah hian parade contingent 17 an awm a, TNT Pipe Band-in band display an entir a ni.
Lawngtlaiah chuan DC J Hmingthanmawia hoin Central YLA khelmualah hun hman a ni. J Hmingthanmawia chuan, remna leh muanna boruak hnuaiah lo chuan hmasawnna ke chheh a har tih sawiin, mipuite chu remna leh muanna chawi nung zel turin a fuih. Lawngtlaiah hian sorkar department hrang hrangte'n an hnathawhte mipui hnena hrilhhriatna thuziak an tár chhuak a ni.
Republic Day hi Mamitah chuan Mangkhawdai playground-ah hman a ni a, DC K Lalthawmmawia khuallian a ni. Mamit DC chuan, mahni inrelbawl theia India siamtu leh nun hlantu te, dan pui ṭha duangtute zahna chibai a bûk a; parade contingent pakua, armed contingent pakhat leh school contigent pariatte'n hnam puanzar chibai a bûk a chhang let a ni.
Serchhipah chuan Leisekawt field-ah hman a ni a, DC Juhi Mukherjee khuallian a ni. DC chuan parade contingent 15-te'n hnam puanzar chibai an bûk a chhang let a; thu sawiin, "Ram danpui avang chauhin rorelna dik, zalenna, intluktlanna leh inunauna kan neih phah a ni," a ti.
Republic Day hi East Lungdarah chuan BDO C Laltleipuii hoin hman a ni a, Khawbungah pawh BDO James Lalnithanga hoin hman a ni. Hriat theih chinah Sangau leh Hnahthialahte pawh hman a ni bawk.