MNYF-in mipui tan nasa zawka chêt an tum

MNF party ṭhalaite chuan thu­chhuah siamin, MNF-in January 22, 2015-a Mizoram khawpui hrang hranga ‘Mipui thlavang hauhna kawngzawh’ an huaihawt chhan hrang hrangte chu mipuite phurrit chhâwk a ṭulzia an tlangaupuina a nih thu an tarlang a, "Mizoram tan leh Mizo mipuite tan tun aia nasa zawkin hma kan la zel dawn," an ti.

MNYF chuan, Congress party ṭhalaite'n thuchhuah siama buhfai man kg. khatah Rs. 9.50 aṭanga Rs. 15-a tipungtu chu Mizoram sorkar ni loin, Central tihpui anga an tarlang chu thu dik lo a nih thu an sawi a, "An tihpunna a nihzia chu sorkar order Memo No. B. 13015/1/2011/DTE(SPY)GEN. dt. 23.12.2014-ah a chiang hle," an ti a; FCI aṭanga buhfai lakna man chu state sorkar thunun theih ni lo mah se, mipuia pekna rate bithliah erawh chu state sorkar thu liau liau a nih thu an sawi.

Congress sorkar chu buhfai man bakah, mipui mimirte nghawng thei chi chhiah leh bill chi hrang hrang tipungah MNYF chuan an puh a, 'Mirethei kan VIP-te ti tlak an nih loh thu an tarlang bawk.