KHAWTHLIR

Kolasib DC Dr H Lalthlangliana chuan, chi leh chi inkara buaina lian zawk thleng palh thei venna turin Vairengte leh Lailapur inkar bakah, Saihapui V leh Phainuam chhehvelah mi panga aia tam punkhawm khapna thupek chu October 17 khan a chhuah. 

Inrinni khan Aizawla KṬP branch pathumin thisen an pe a; Aizawl Civil Hospital (ACH) tan Chhinga Veng Branch aṭangin mipa 50 leh hmeichhia pariatte'n unit 58 leh Bungkawn Branch aṭangin mipa 23 leh hmeichhia 12-te'n unit 35 an pe a, Dawrpui Vengthar Branch-in Synod Hospital tan unit 23 pein, a petute mipa 20 leh hmeichhia pathum an ni. Evangelical Baptist Convention (EBC) hnuaia Baptist Youth Fellowship (BYF)-in ACH-ah unit 34 pein, a petute mipa 24 leh hmeichhia 10 an ni a; Falkawn ṬKP-in ZMC-ah unit 10 an pe bawk.

Covid-19 vei State Referral Hospital (SRH)-a enkawl mek zinga pakhat chu ICU-ah ventilator hmantir mek a ni. October 17, Inrinni leh nimin khan Covid-19 vei mi pali ve ve dah luh an ni a, anni nen SRH-ah hripui vei vangin mi 46 an awm mek. SRH-ZMC Bulletin tarlan danin, Mi 46 zinga panga chu ICU-ah enkawl niin, pakhat chu ventilator hmantir mek a ni a, ward-a awm zingah ngaihtuahawm an awm lo.

Mamit DC Dr Lalrozama chuan thuchhuah siamin, Mizoram leh Assam ramri buai chungchangah, Mamit district mite chu an khua leh veng ṭheuhah pawisawilo, a bikin hnam dangte chu him leh thlamuang taka an awm theih nan hma la ṭheuh turin mimal leh pawl tin a ngen.

 Darthangluaia, Diphu, Assam chu October 16, Zirtawpni zan dar 9 vel khan GMC-ah a thi a, amah hi Covid-19 vei a nih avangin GMC-ah hian enkawl a nia thu dawn a ni. An chhungkua hi Diphu-ah in leh lo neia awm nghet an ni.