Covid-19 +ve chhuahtir vangin Health Minister-in ngaihdam a dil. 'Ni 10 awm tlin vanga Covid-19 vei chhuahtir a ṭha lo' - Duhoma

Covid-19 la vei tih hriat chian chunga September 1, 2020-a mi pariat chhuahtir chungchangah ZPM Legislature Party (ZLP) leader Lalduhoma chuan nimin khan Assembly session-ah calling attention motion a pu lût a; Covid-19 an vei tawh lo tih finfiah a la nih hma si, ni 10 an awm tlin tawh avanga chhuahtir ṭha a tih loh thu a sawi. Hemi chungchangah hian Health minister Dr R Lalthangliana chuan mipui hnenah ngaihdam a dil.

Lalduhoma chuan, Ministry of Health & Family Welfare-in May 8, 2020 khan Revised Discharge Policy of Covid-19 a tichhuak tih sawiin, "He policy hnuaiah hian Covid-19 veite chu chi thumin a rawn ṭhen a, mild, moderate leh severe tiin. A ziaawm deuh, 'mild' an tih ho kha quarantine centre-ah ni 10 an awm tawh chuan, in lama ni sarih inkhung leh tura chhuah theih a ni. Mahse, India ram hmun dangah pawh he policy hi an zâwm lêm lo niin a lang. MHA standard operating procedure-ah pawh zawm a hlawh lo," a ti.

Covid-19 chungchangah mithiamte'n research an tih nasat thu sawiin ZLP Leader chuan, "Research a kal zel a, finfiah tak tak theih a ni lo. Tuna Covid-19 vei chunga chhuahtirte hian in lama inkhung hranna facilities an nei lem lo. Ṭhenawm khaw­véng, khawtlang an tiphâwklêk. Chumi hnuah koh kìr leh turin tih an ni a, pakhat chu contact theih a ni lo tih a ni," a ti a; Covid-19 la veite chhuahtir chungchangah Health department-in chak taka hma a la zui chu lawmawm a tih thu a sawi.

Lalduhoma chuan, Mizoram sorkarin Discharge Policy of Covid-19 a duanga a hriat thu sawiin, "Kan ṭangho zel ang a, tun dinhmunah chuan inenkawl theih niin a lang. Enkawl sên loh khawp an awm a nih chuan loh theih lohnain min nangah ngai ila. Chutiang a thlen hma chuan ni 10 hnua inchhuahtir ngawt hi chu tih loh hrâm ṭha ka ti," a ti.

Hetih lai hian Health Minister chuan, Covid-19 veite ni 10 enkawl an nih vanga chhuahtir an ni tih a hriat ve leh Health Secretary a biak nghal thu sawiin, Health Secretary chu meeting koh ṭha a tih thu a hrilh a, a tûk first hour-ah a koh nghal thu a sawi.

Dr R Lalthangliana chuan, Covid-19 la vei chunga chhuahtirte chu CMO, MO leh ZMC lamte inberáwnin an chhuahtir nia sawiin, "Pawi ka ti khawp mai. Notification pawh chhuah si loa Covid-19 la veite chhuahtir an nih avang hian House kaltlangin mipui hriatthiamna ka ngen a ni," a ti a; a chhuahtirtute pawhin Health Secretary hnenah ngaihdam dilna an thehluh tawh tih House a hrilh.

Covid-19 veite chungchangah doctor thiam ṭhenkhatte telna committee siam a nih thu sawiin R Lalthangliana chuan, "Mithiamte hian ngaihdan an thehlut a, an rawtna hi thlirho a ni. Covid-19 chungchang hi Home leh DMR department lamte nen pawh vawiduailo sawiho a ni. Fimkhur taka kalpui a ngai a, sorkarin ngaihdan a la khawm mek zel," a ti. 

Health Minister chuan, scientist leh researcher-te pawhin vawi tam tak Covid-19 an zir chian thu sawiin, "Virus a inthlak danglam zing a, natna danglam tak, zir chian mek a ni. ICMR pawhin Rapid Antibody Test ṭha an ti a, a hnuah hman ṭha an ti leh lo. WHO pawhin a ngaihdan a thlâk leh ṭhin," a ti a; Mizoramah chuan Covid-19 veite chu CCC-a enkawl vek a, hripui an vei tawh lo tih finfiah a nih hnuah chhuahtir ṭhin an nih thu a sawi.

Dr R Lalthangliana chuan, tihsual, tihpalh leh rilru tihnatte an neih a rin thu sawiin, "Hriatthiamna ka ngen ngawih ngawih a ni. Covid-19 hian eng chen nge min chàm chilh dawn kan hre lo, mi tinin kan tih theih chu fimkhur a ni. Mipuite'n sorkar thuchhuah ngai pawimawh lehzual se ka duh. Tu mah i inphatsan lo ang u," a ti.

Covid Care Centre turah harsatna a awm thu sawiin Health Minister, "CCC atan hian department ṭhenkhat hmunhmate kan dil ṭhin a, mahse, task force lam aṭangin harsatna kan tâwk leh ṭhin. 'Dam leh tláng khatah, thih leh ruam khatah' tiin, inhriatthiamna nen kal ila ka duh," a ti a; Covid-19 do kawngah sorkarin theihtawp a chhuah zel tur thu a sawi.