Roll aṭanga Bru-te paih tura dilna a awm lo
General Administration department (GAD) changtu chief minister Zoramthanga chuan ZPM Legislature Party leader Lalduhoma zawhna ziaka chhángin, Tripura-a Bru-te Mizoram electoral roll aṭanga paih tura dilna a awm loh thu a tarlang.
Lalduhoma hian, January 16, 2020-a Bru chungchanga inremna thuthlung (agreement) ziah a nih tawh hnuah, village council leh local council inthlanah Bru-te candidate leh voter nih theihna pek an la nih leh nih loh a zawt a ni.
Chief Minister chuan, Mizoram (Election to Village Councils) Rules, 2014-in a sawi angin, Last Published Electoral Rolls of Legislative Assembly Constituencies (Election Commission of India) chu draft roll emaw mother roll-ah hman tur a nih angin, VC inthlanah pawh hman a nih thu a tarlang.
Chief Minister tarlan danin, VC inthlanah pawh MLA inthlan hnuhnung bera electoral roll chu draft/mother roll atan hman a ni a, chutah chuan Tripura-a awm Bru-te pawh an la chuang a ni. Revision neih laiin Bru-te chu paih (delete) tura dilna a awm loh avangin final electoral roll-ah pawh an la tel zel a, chuvang chuan candidate leh voter an nih theih lohna a awm lo a ni.