Car loan hmanga inbumna lianah Police-in chargesheet thehlut tawh

Mizoram Police chuan Mahindra & Mahindra Financial Services Ltd. (MMFSL) chhunga sum tihchingpenna lian ber, hmarchhak state pum tuamtu an chhui chho zel a, Mizoram leh Assam-ah mi eng emaw zat manin, a chhuina report (chargesheet) pawh Aizawl Chief Judicial Magistrate-ah an thehlut tawh.

Police tarlan danin, MMFSL chhunga car loan sum tihchingpen chungchangah hian police-te chuan phek 300 chuang chargesheet an siam a, pawi khawihnaa bul tumtu Jakir Habibur Hussain (41) s/o Habibur Hussain (L), KV Tlangmawia Building, Tuikhuahtlang (permanent address - Tejpur, Assam) leh a thurualpui mi 19 hming tarlan a ni.

MMFSL Area Manager Jakir Hussain hian Khatlaa a pisa aṭangin Mahindra Finance Company hnuaia a thawhpuite leh Aizawla car dealer-te nen inremsiamin inbumna a kalpui a; he pawikhawihnaah hian cheng vbc. 150 vel tihchingpen a ni. Jakir-a thurualpui car dealer zingah CK Hyundai, National Business Enterprise (TATA), Rafael Nissan leh AIDU Motors (Renault)-te an tel.

He thubuai chhuinaah hian bank account 177 hren a ni a, chu'ng bank account-ah chuan cheng vbc. 5 a awm. Car model hrang hrang 15 man a ni bawk a, chu'ngte chu cheng vbc. 10.5 vel hûa chhût a ni.

Customer lem loan lakna 2,035, seal leh stamp lem 25, laptop pathum, mobile phone 10, SIM card 35, mimal identity card eng emaw zat leh, pawi khawihna atana hman ni ngeia hriat hmanrua eng emaw zat man a ni bawk.

Police-in inhnamhnawiha an ngaih mi 20-te lakah June 25, 2024 khan Crime & Economic Offences PS-a thubuai ziah luh bikah phek 182-a sei chargesheet an siam a; Aizawl PS-a thubuai ziah luhah July 10 khan phek 114-a sei chargesheet an siam leh a ni.

He inbumna chungchangah hian March 20, 2024 khan Aizawl Police Station-ah IPC Section 408/467/468/34 tlawhchhanin thubuai ziah luh a ni. FIR thehluttu chu MMFSL circle head Ankit Bagree a ni a; FIR-ah chuan Mizorama MMFSL area business manager Jakir Hussain-a'n lirthei loan a pek chhuah danah sum a tichingpena an hriat thu a tarlang. MMFSL hi lirthei loan pe chhuaktu a ni.

A hnuah MMFSL business head Chanpreet Singh-a'n FIR a thehluh angin March 29, 2024 khan IPC 408/419/466/467/472/471/477A/120B/34 tlawhchhanin Crime & Economic Offences PS-ah thubuai ziah luh leh a ni bawk.

Aizawl West District deputy chief medical officer Dr Lalnienga'n tun hnai khan SBI, Dawrpui Branch-a a CIBIL score a enfiah (check)-naah MMFSL hnuaiah a hriat lohin lirthei loan la anga process a nih thu a hriat chhuah avangin complaint a thehlut a; Crime & Economic Offences PS-ah IPC 408/419/466/467/472/471/477A/120B/34 tlawhchhanin thubuai ziah luh leh niin, chhui zui mek a ni.

MMFSL hmanga suh tihchingpen chungchang hi chhui zui zel a ni tih tarlangin police-te chuan, "Inhnamhnawih mi dangte pawh an la awm nia hriat a ni a, mihring leh bungrua man belh a awm a nih chuan chargesheet a ṭul anga siam belh a ni ang," an ti.

Police thuchhuah chuan, mi hriatpui loha loan lem siamna atana an document an hmansakte hnen aṭangin complaint a la luh belh zel tura an ngaih thu an tarlang bawk.

PAWI KHAWIH DAN TLANGPUI

A. Jakir-a leh a thurualpuite'n rinhlelh an hlawh loh nan leh an loan account lem a NPA loh nan an loan account lem tan regular takin EMI an pe thin.

B. Jakir-a hian a pawi khawihnaa pui turin Manoj Sunar chu thla khata Rs 15,000 hlawhin a ruai. Jakir-a hian document lem siamna atan stamp lem a siam ṭhin. Company-in audit an neih dawnin document lemte chu office aṭangin a mi chhawr Manoj-a inah an thukru ṭhin. Manoj-a in dap a ni a, document lem buara ip 7 khat, file 549, kum 2022, 2023 leh 2024-a mite man a ni a, stamp lem 25 man a ni bawk. Manoj Sunar hi April 3, 2024 khan man a ni.

C. KYC verification, auditing, verification leh supervisory mechanism-a company system famkim tawk lohnate remchangah lain hun rei tak chhung thil an lo tichingpen tawh.

D. He inbumnaah hian car dealer pali - CK Motors (Hyundai), NBE (Tata), Rafael Nissan leh Aidu Motors (Renault)-te an inhnamhnawih tih hmuh chhuah a ni.