Mizoram sorkar damdawi-in paliin NQAS certification an hmu thar

India rama damdawi-in ṭha tehna, National Quality Assurance Standards (NQAS) chuan Mizorama damdawi-in pali - Aizawl Civil Hospital, Lunglei Civil Hospital, Champhai District Hospital leh ITI Veng Urban Primary Health Centre (UPHC)-te chu tun hnai khan NQAS certification a pe.

NHM hotute hnen aṭanga thu dawn danin, NQAS certification hmu tur hian district, state leh national level-ah tehna hrang hrang 2,000 chuang paltlang a ngai a; Aizawl Civil Hospital-in 94% hmuin, Lunglei Civil Hospital-in 93% a hmu a, premium-ah an tling. Champhai District Hospital-in 87% hmuin, ITI Veng UPHC chuan 85% an hmu thung.

Damdawi-in palite hi NQAS tehnaah an tlin avangin NQAS certificate pek an ni a, a hmain Mizorama PHC pathum leh UPHC pakhat hnenah NQAS certificate pek a lo ni tawh bawk a; Mizorama damdawi-in pariatin NQAS certification an hmu tawh a ni.

Civil Hospital, Aizawl leh Civil Hospital, Lunglei te chuan NQAS certification dang pahnih - MusQan (naupang lam enkawlna ṭha bik) leh LaQshya (nau neihna hmun ṭha bik) certificate an dawng tel bawk.

NHM mission director Dr Eric Zomawia chuan, Mizoramin damdawi-in ṭha bik thlan chhuah a neih belh zel chu Mizoram tan mellung pawimawh a nih thu sawiin, thawktu zawng zawng inpekna leh thawhho ṭhat vang a nih thu a sawi a; NQAS certification hmu ve thei tura ṭang turin damdawi-in dangte a chah. "Kan thawhna ṭheuhah taimak chhuah chhunzawm a, kan thawhho ṭhatnate kan nunphunga bet tlat tura tha thlah loa kan ṭanrual a pawimawh," a ti.