Sorkar hnathawk tan an hna thilah political party mite rawih khap a ni

Department of Personnel and Administrative Reforms (DPAR) chuan tun hnai khan office memorandum tichhuakin, sorkar hnathawkte tan an hna thilah political party mite leh páwn lam mite rawih khap a nih thu a tarlang.

DPAR chuan, sorkar hnathawk tu mahin sorkar hnuaia hna a thawhna chungchangah thuneitute ngaihtuahna kaihruai turin political party worker emaw, pawn lam mite emaw an hmang tur a ni lo tih a tarlang a; chutiang thil chu chíng lo turin sorkar hnathawk zawng zawng a hriattir nawn leh a ni.

Sorkar hnuaia rawngbawlna, transfer leh posting, sorkar quarters, etc. chungchangahte duh zawng tihhlawhtlinna atan political worker emaw, pawn lam mite rawih leh hman pawh tum loh tur a ni tih tarlangin DPAR chuan, "Inkaihhruaina awm reng chunga danin a sawi kalphung pangngaite kalh zawnga thuneitu sang zawk hnena zualkona/dilna thlentu chu CSS Rules hmangin hrem theih a ni," a ti.

DPAR chuan, sorkar hnathawk chhung leh khatte'n an chhungte tan sorkarah thu thlen an nei fo tih tarlangin, "A ṭhen phei chu sorkar hnathawk thu thlen tawh, tharthawh lehna atana thlen a ni fo," an ti a, a chang chuan dan kal pelh duh vanga thu thlen a awm theih thu a tarlang.

Sorkar hnathawk tana an chhungte'n thu an thlen chu thil ṭha lo tak leh tih miah loh tur a ni tih tarlangin DPAR chuan, "Chhung leh khatte'n sorkar hnathawk aiawha thu an thlen chu thu tlingah pawm loh tur a ni. Sorkar hnathawk a thih emaw, taksa lama harsatna leh rualban lohna a neihin emaw, chhan leh vâng ṭha tak a awm a nih chauhin lehkha thehluhte chu ngaihtuah tur a ni ang," a ti bawk.