Zangnadawmna bituk dana lungawi lo mi pasarih Lokayukta-ah an zualko

National Highways & Infrastructure Deve-lopment Corporation Limited (NHDCIL)-in National Highway-06 zauh hna an thawhnaa ram an laka zangnadawmna a bituk dana lungawi mi pasarih chu Lokayukta-ah an zualko.

Mi pasarihte hian a hranpa vekin Lokayukta-ah complaint an thehlut a, a thehlut hmasa ber chuan April 4, 2024 khan thehlutin, thehlut hnuhnung ber chuan June 10, 2024 khan a thehlut. Mi dangte thehluh ni chu kumin April 16 leh May 21-ah mi pakhat ve ve leh June 3-ah mi pathum an ni.

Complaint lut hmasa ber chungchangah hian Lokayukta chuan April 16, 2024 khan Aizawl DC, Land Resources, Soil & Water Conservation (LRSWC) leh Land Revenue & Settlement (LRS) department-ah lehkha thawnin, hriat duh an neihte a zawt. LRS department-in Lokayukta zawhna an chhàn tawh laiin, Aizawl DC-ah chuan May 27 khan Lokayukta chuan reminder an thawn.

June 10, 2024-a complaint lut chungchangah Lokayukta chuan preliminary enquiry ti turin thutlukna a siam a, Anti Corruption Bureau (ACB) chuan May 13, 2024 khan preliminary enquiry tih turin a ziak lut.

Complaint lut dang zawngah chuan Lokayukta chuan Saitual DC hnenah lehkha thawnin, hriat duh a neihte a zawt a; Saitual DC chhanna an ngaichâng mek a ni.