Mumbai-a Mizoram State Guest House sak muan avangin satu thlak tum a ni

Chief minister Lalduhoma chuan July 14, Pathianni khan Mumbai-a Mizoram House tlawhin, thawktute leh damlote a kawm a; Navi Mumbai-a Mizoram State Guest House & Emporium tur kum 2013-a sak ṭan tawh chu tun thlenga zawh a la nih loh avangin satu tur a thara ngaihtuah a nih dawn thu a sawi.

CM Lalduhoma chuan, Mizoram State Guest House & Emporium tur satu US Roofs-in Mizoram sorkar nena an inremna bawhchhiaa hna an thawh muan avangin Mizoram Assembly Committee pawhin an tlawh tawh thu a sawi a, "Sorkarah rawtna kan thlen. Sorkarin ngaihtuahna thar sêngin Law & Judicial department-in an zir chian hnuah US Roofs nena agreement tihtawp a, tha thara a satu tur zawn ni se. CIDCO-in min pek dan ang tak leh Mizo mipuite'n hlawk zawka kan hman ṭangkai theih ngei tura sak ni se kan ti ta a ni," a ti.

Chief Minister hian Mumbai Mizoram House-a cancer enkawl laite tan Rs 2,00,000 a pe a ni.

Sorkar thuchhuah tarlan danin, September 8, 2008 khan City and Industrial Development Corporation of Maharashtra (CIDCO) chuan Vashi (Navi Mumbai)-ah Mizoram sorkar chu kum 90 chhung atan ram a pe a, square metre 1983.48-a zau a ni.

Mizoram sorkar chuan builder company US Roofs Ltd. chu January 30, 2009 khan inremna a ziahpui a, chumi ang chuan US Roofs-in CIDCO Managing Director-ah Mizoram sorkar hmingin full premium cheng vbc. 3.8 an pe. March 9, 2010-ah Mizoram sorkar leh CIDCO-in inremna an ziak ve leh a ni.
Inremna ang chuan CIDCO-in ram a pek chu Mizoram sorkarin State Guest House & Emporium atan a hmang ang a, thil dangah a hman phal a ni lo. Agreement ziah aṭanga kum 5 chhunga sak zawha luah hman tur a ni a; kum 5 chhunga zawh a nih loh chuan sum (additional premium) pek belha sak chhunzawm theih a ni.

US Roofs nena inremna siam hmasakah Mizoram sorkar chuan in (sak tur) chhunga Mizoram chan (space) a zîm lutuk nia a hriat avangin June 2, 2011-ah US Roofs chu Development Agreement (Revised) a ziahpui leh a; Mizoram sorkar chan tur chu sq.ft. 9,500 (25%) a ni a, US Roofs-in 75% an chang thung.

In sakna turin March 1, 2013 khan khatih laia Mizoram Chief Minister-in lungphùm a phûm a; sak hna ṭan nghal niin, foundation piling work eng emaw zat zo tawh mah se, kum 5 chhungin an sa zo hman lo. CIDCO chuan US Roofs chu kum 2 dang (March 8, 2017 thleng) extension fee pe turin a ti a, mahse, an pe duh lo a; March 8, 2019 khan extension fee pea sak chhunzawm turin CIDCO chuan phalna a pe leh a, US Roofs chuan an pe duh ta chuang lo a ni.