Minister-te'n Vaivakawn lei tlahniam an en

Minister of state pahnih - Prof. Lalnilawma leh Lalnghinglova Hmar te chuan nimin khan Vaivakawn Zohnuaia lei tlahniam vanga harsatna thleng a hmunah an enfiah a, harsatna tâwk chhungkuate nen an inkâwm.

Prof. Lalnilawma chuan, Vaivakawn Zohnuai kawng tlahniam vanga chhungkaw eng emaw zatin harsatna an tâwk chu pawi a tih thu sawiin, chhiatna nasa zawk a thlen loh nan mithiam ráwn chungin ruahmanna siam a nih tur thu a sawi.

Lalnghinglova Hmar pawhin chhawmdawlna leh thawm ṭhat hna thawhna turin Aizawl District Disaster Management Authority, PWD leh PHE department hotute hnenah harsatna thlen a nih tawh thu a sawi bawk.

Vaivakawn khawtlang hruaitute sawi danin, kum 2017-a Hunthar Veng-Rangvamual inkar kawng min aṭangin Vaivakawn Zohnuai kawng a tlahniam ṭan a, July 2024 khan kawng chu tlahniam zualin, nimin thleng khan chhungkaw 35 velin an in an chhuahsan tawh.

Khawtlang hruaitute chuan, Zohnuai kawnga tui luankawrte chu thawm ṭhat thuai a ngaih thu leh Luangmual Chhangurkawn panna kawnga in ṭhenkhat tan pawh a hlauhthawnawm theih thute an sawi bawk a ni.

Lei tlahniam ennaah hian deputy govt. chief whip W Chhuanawma, PWD leh DMR department hotute pawh an tel a ni.