Dâwt hâl programme kan siam dawn - Robert Romawia

MNYF president Robert Romawia Royte, MLA chuan, ZPM sorkarah thu dik lo sawi a hluar nia sawiin, MNYF-in dâwt hâl programme siam an tum thu a sawi.

Robert Romawia Royte chuan nimin khan Mizo Hnam Rûna inkhawmah thu sawiin, "ZPM-a an hotute'n tîmna nei miah loin an sorkar hma leh an sorkar hnuah pawh mipui dâwt an hrilh nasa a, hei hi kan hnam leh sakhuana atan a ṭhat loh avangin mipuite thu dik hrilh kawngah MNF-te'n nasa lehzuala ṭan lak a ṭul," a ti a; mipuiin thu dik an hriat theih nan ZPM sorkar hotute dâwt sawi hrang video leh hard copy-te puang chhuak turin dawt hâl programme an siam dawn thu a puang a ni.

ZPM hotute'n dan loa thil lo lutte thla khat chhunga tihtawp an tiam laiin a zual tulh tulh a, kudama hrênbeh sa kuhva ro ip 5,000 chuang smuggler-te'n nuamsaa an lak chhuah theih thu sawiin Robert Romawia chuan, "Kuhva tawlhrutute an huangtau em em chhan hi ZPM hruaitu ṭhenkhat vang niin a lang. Dan loa kuhva tawlhruk Hachhek bialin kan tuar nasa a, Hachhek bialah hian dan loin tuma'n kuhva rawn phur lut tawh lo se, lo phur lut lui an awm chuan an tan a pawi thei tih ka puang chiang duh a ni," a ti.

MNYF President chuan, minister pakhatin Pathian an ṭih vanga utilisation certificate dik lo an siam duh lo a, SASCI sum a lapse phah anga a sawi chu, "Dâwt thup mawi nana Pathian hming hman kha a pawi hle. ZPM sorkar hian SASCI sum a vaiin Finance-ah an kawl táng tlat a, SASCI sum lapse kha ZPM hotute Pathian ṭih vang ni loin, first instalment sum deparment-a pe chhuak loa an kawl tlat vang zawk a ni," a ti a; SASCI sum leh central project sum dangte chu hlawhah an hmang zel niin a sawi.