NHM doctor lâk tharte training neihpui

National Health Mission (NHM) chuan nimin khan NHM pisaah NHM hnuaia medical officer lak tharte tan orientation/induction training ṭum hnihna an buatsaih ṭan a, July 20, 2024-ah khâr a ni ang.

Orientation training ṭannaah hian NHM mission director Dr Eric Zomawia chuan, NHM medical officer (MO) tharte chu ram leh khawtlang tana theihtawp chhuah tur te, an mihringpuite tan ṭha taka thawk tur te, rinawm taka mahni thawhna hmuna awm turtein a chah a; hlawh hmu tlaka thawk tur leh an thawh zelna turah tluang taka thawk turin duhsakna a hlan.

MO tharte chu nimin khan Health Services assistant director Dr Zorinsangi'n Health & Family Welfare department nihphung leh hnathawh dante a zirtir a; NHM state programme manager Dr B Lalthantluanga'n NHM hmalakna leh hnathawhte a zirtir thung. Training chhungin NHM hnuaia programme hrang hrang kalphung leh hnathawh dante zirtir an ni ang.