Sorkar kal tawhte avangin sum pûk lo thei loin kan awm - Sawivunga

Minister C Lalsawivunga chuan nimin khan ZPM party pisaa inkhawmah thu a sawi a; sorkarna lo siam tawhte tih theih loh ZPM kaihhruai sorkarin hun rei lo te chhungin a ti tawh niin a sawi a; sorkar kal tawhte avangin sum pûk lo thei loin an awm a, sum an pûk a, an pûk chhunzawm zel pawh a la ngaih tur thu a sawi bawk.

C Lalsawivunga chuan, "Kum 37 sorkarna inchhâwk siamtute'n an tih theih loh, tih duh loh leh tih ngam loh thla 7/8 vel lek chhungin thil ṭha tam tak kan thawk a, opposition-te hian min sawisel bak tih theih an nei lo. Thil ṭha ti tura din he sorkar hian sawiselna karah pawh ke a pen chho zel dawn," a ti.

Social media a chak avangin an tih dik loh pawh ni lo, ṭha taka an thawhte pawh sawiseltu an awm ṭhin tih sawiin Lalsawivunga chuan, "Opposition party-te hian politics nia an hriat chu rorel lai sawisel a ni ber a, thu dik tâwk lo leh rintlak mang lo hmangin a rem dan danin sorkar an sawisel a, sawichhiat hrim hrim tumna ni berin ka hria," a ti a; an dik lo a nih chuan sawiselna an pawm thu a sawi.

C Lalsawivunga chuan, MNF sorkarin leiba cheng vbc. 13,584.80 a hnutchhiah a, chu chu khatih laia budget pumpui cheng vbc. 14209.94 aṭangin 95.6% a tling tih a sawi. "Leiba phur chungin ram rorelna kan kalpui a, pûk lo thei loa min siam avangin kan pûk a, pûk chhunzawm zelte pawh a la ngai ang. Sorkarin sum a pûkte chu a hmanna tur dik takah kan hmang dawn," a ti.

ZPM sorkarin health care bill bá leh kawlphetha hman man bá a tlak tawh thu sawiin Lalsawivunga chuan, "Sorkar hnathawkte hlawh thla tir lamah pension hlawhte nen kan pe thei zel. Pension la chinfel loh tam tak chinfel chhoh zel a ni a, kum 20 chuang sorkara lo thawk tawhte dinhmun chawikang turin dahnghehna turte siam a ni," a ti a; chu'ngte chu sorkar hmasa lamin an tih duh loh leh tih theih lohte a nih thu a sawi.

C Lalsawivunga chuan, sorkar laipuiin Post Devolution Revenue Deficit (PDRD) grant a rawn pe tlem tial tial tih sawiin, "MNF sorkarin budget an pharh hnuhnung ber 2023-ah khan PDRDF cheng vbc. 1,474 a ni a, kuminah vbc. 1,079-ah a tla thla a, 2025-26 ah phei chuan vbc. 586 chauh kan dawng tawh dawn. He sorkar hian a sum neih ang angte revenue thawk chhuak zawnga hmang turin a kalpui zel a ni," a ti.

C LALSAWIVUNGA'N A DEPARTMENT CHUNGCHANGA A SAWI

◆ Village Council Act & Rules 1953 a hlui tawh avangin siamṭhat tum mek a ni a, VC/LC inthlan hunah chuan dan thar hnuaiah kan inthlan theih kan beisei. 15th Finance hnuaia 2021-22 grant-te chinfel loh a la ni a, kan sorkar hnuah chinfel a ni.

◆ Art & Culture department-ah hna thar post 14 kan dil a, min pawmsak angin kan la dawn.

◆ AH&Vety hnuaiah Thenzawlah ṭin 72-a zau ran chaw hmun siam a ni. State dang aṭangin vaimim kg-ah Rs 24-in kan la lut a, Myanmar aṭangin hetiang tho hian kan lei bawk. Ran chawa intodelh turin bekangah pilot project siamin hma kan la mek.

◆ Minority lamah hma thar lakna tur project 68 central lamah theh thlak a ni tawh.