Ruihhlo donaa hmalak dan tur rêl

Working Committee on Ruihhlo Do chu nimin khan Secretariat Conference Hall-ah an chairman Lalnghinglova Hmar, Excise & Narcotics minister hoin an ṭhukhawm a, Mizorama ruihhlo do dan tur leh a kaihhnawh thilte an ngaihtuah.

Nimina an ṭhutkhawmah hian Mizorama ruihhlo do dan tur leh ruihhlo tirêm tura hmalak dan turte an ngaihtuah. Hmalaknaa sum mamawh tur zat an duang a, budget chu Mizoram sorkarah an thlen dawn a ni. District leh village/local level-a Task Force on Ruihhlo Do din dan tur an ngaihtuah bawk.

Working Committee on Ruihhlo Do hian Mizoram pumpuiah khaw tin fang chhuaka ruihhlo do pawl din leh kil thum - supply deduction, demand reduction leh harm reduction aṭanga ruihhlo do dan tur an rêl a; Mizoram sorkarin sum mamawh a pek veleh a rang thei ang bera hmalak nghal ni se, an ti.

Ṭhutkhawmah hian Excise & Narcotics, Police, Social Welfare & Tribal Affairs, School Education, Higher & Technical leh LESDE department bakah Food & Drugs Administration hotu te, Central YMA, Mizoram Kohhran Hruaitute Committee, MJA, MZP, MSU, Aizawl City Local Council Association leh zirtirtu pawl aiawhte leh psychology lama mithiamte an tel.

Working Committee on Ruihhlo Do hi Chief Minister kaihruai State Level Core Committee on Ruihhlo Do hnuaia din a ni.

Ruihhlo donaah hian Mizoram sorkar chuan supply reduction-ah Excise & Narcotics chu nodal department-ah a puang a; demand reduction leh harm reduction-ah Social Welfare & Tribal Affairs department chu nodal department-ah a puang bawk.