KHAWTHLIR

Tlawngah tla hlum

Nimin chawhnu dar 2:30 vel khan Lalhmingsanga (20) s/o C Ngurliana, Buang, Champhai district chu Tuithum luiin Tlawng a finna chhak khawthla líah a tla hlum. Lalhmingsanga hi a ṭhiante nen tuiah an chêng a, a tâlbuai hnuah a ṭhiante'n an chhan thei lo. Mi dang an pun hnua lak chhuah a nih chuan a lo thi tawh a ni. Lalhmingsanga hi T Romana College-a zir lai a ni a, Bethlehem Vengthlanga an chhungte inah a awm a ni.

Driver/conductor pawimawh zirtir

Aizawl City Bus Owners' Association (ACBOA) chuan July 14, Pathianni khan city bus driver leh conductor-te Vanapa Hall-ah an ko khawm a, city bus service atana thil pawimawh hrang hrang an inhrilh. ACBOA president PC Malsawma leh vice president PC Zoliansanga ten city bus service laia awm dan tur, nun dan mawi leh thil pawimawh dangte an sawi a ni.

Kawlpthetha pe thei dawn lo

Power & Electricity department chuan tukin zing dar 9 aṭanga tlai dar 5 chhung hian 33KV Line (Melriat-Aibawk)-ah hna an thawh dawn avang chhimphei huam chhung leh khawthlang lam khaw ṭhenkhatte'n kawlphetha an hmu thei dawn lo tih an tarlang. Kawlphetha hmu lo turte chu Tachhip, Aibawk, Sateek, Phulpui, Lungsai, Maubuang, Ṭhiak, Sumsuih, Hmuifang, Chamring, Chawilung, Sialsuk, Samlukhai, Lungsei, Sailam, Bawlte, South Sabual, Darlung leh Bawngthah te a ni.

AR-in heroin man

Assam Rifles chuan July 14, Pathianni khan Melbuk huam chhungah Myanmar lam mi pakhat hnen aṭangin heroin (no. 4) gram 55 an man a, Zokhawthar police hnenah an hlân. Heroin an man hi Rs 38,50,000 hû a ni.

Office-te ṭhukhawm

Lunglei district bawrhsap R Lalṭhazuala kaihhruaiin nimin khan DC conference hall-ah Lunglei district-a sorkar department hrang hrangte hnathawh leh dinhmun sawihoa ṭhutkhawm a ni. Ṭhutkhawm hi thawh lia neih tura ruahman a ni a; nimin khan sorkar office 22 an ṭhukhawm a, vawiinah office 33 an ṭhukhawm leh ang.