Statistical Handbook 2014 tlangzarh Mizoramah damdawi-in 97 a awm

Planning & Programme Implementation minister Lalsawta chuan nimin khan a pisaah Economics & Statistics directorate buatsaih, ‘Statistical Handbook Mizoram 2014’ a tlangzarh. Statistical Handbook thara a lan danin, Mizoram pumah damdawi-in 97 a awm a, chu'ng damdawi-inahte chuan khum 3,002 a awm.

Minister Lalsawta chuan, inrêlbâwlna leh hma­sawnna kawngah statistics ṭha leh rintlakin dinhmun pawimawh tak a luah tih sawiin, "Statistical data reng reng a dik tak kan lak khawm a, kan vawn ṭhat a ṭul a ni," a ti a; Eco­nomics & Statistics chu department lian ni lo mah se, an hnathawh a pawimawh thu leh, Statistical Handbook thar chu sorkar department leh mipuite'n ṭangkai taka an hman a beisei thu a sawi.
Statistical Handbook Mizoram 2014 hi bu khat Rs. 50 man a ni a, Aizawlah chuan vawiin aṭangin Economics & Statistics directorate, Nursery Vengah lei theih a ni ang a, district headquarters dangah chuan February 2, 2015 aṭangin lei theih a ni ang.
Statistical Handbook Mizoram 2014-in a tarlan danin, kum 2014 thleng khan Mizoram pumah Mizoram sorkar enkawl damdawi-in 81 a awm a; chungte chu - damdawi-in puitling (hospital) 12, community health centre (CHC) 12 leh primary health centre 57 a ni a, health sub-centre 370 a awm bawk. Damdawi-in zat hi kum 2012-13 nen a danglam lo.
Damdawi-in 81-ah hian khum 1,949 a awm a; hospital 12-ah khum 1,019 awmin, kum 2012-13 aiin khum 15-in a tlem. CHC 12-ah khum 360 a awm a, PHC 57-ah khum 570 a awm.
Damdawi lama thawktu tarlanah, kum 2013-14 khan doctor 438 an awm a, kum 2012-13 aiin pakuain an tlem. Kum 2013-14 ah hian nurse 496 an awm a, pharmacist 92, health worker 498 leh laboratory technician 58 an awm.
Mizoramah sorkar enkawl ni lo damdawi-in (private hospital) 16 a awm a, chung zinga 11 chu Aizawl khawpui chhunga mi a ni. Private hospital-ah hian kum 2013-14 khan khum 1,053 a awm a, kum 2012-13 a khum awm zat 1,083 aiin 30-in a tlem zawk a ni.
Statistical Handbook Mizoram 2014-ah hian Lungleia private hospital pahnih - Hope Hospital leh Faith Hospital bakah DM Hospital, Champhai-te tarlan tel a ni lo. Heng damdawi-in pahnihte nen chuan Mizoramah damdawi-in 100 a awm tihna a ni.