AMC sorkar tihdanglam tum lo

Aizawl Mu­nicipal Council (AMC) vice chair­­man Lal­rinenga Sailo chuan Vanglaini pa­lai zawhna chhang­in, AMC sorkar tih­danglam tumna a awm loh thu a sawi.

MNF councillor Lal­rinenga Sailo chuan nimin khan AMC-a sorkarna siamtu political party hrang hrang councillor-te an ṭhutkhawmnaah thu a sawi a, "Ṭha takin thil awm dan kan sawiho a, kan hlim tlang hle. Tuna AMC sorkarna siam mekah hian harsatna a awm kan hre lo. MPC councillor-te thlauhthlak tumna awm anga sawi hi thil hriatsual palh vang mai maiah kan ngai," a ti.

Lalrinenga Sailo chuan, ZNP councillor ṭhin Hmingthanzami leh Lalrimawia bakah, MPC councillor ṭhin Rosiamngheta te chu zawm mumal nei loa an awm avangin, AMC sorkar chu thlawp tura sâwm an ni tih a sawi a; anni sàwm an nih avangin MPC councillor pahnih - PC Lalruatsanga leh C Lalsawivunga-te thlauhthlak tumna a awm lo tih a sawi bawk.

Tarlan tawh angin, MPC ṭhalaite chuan thuchhuah siamin, an party councillor pahnih chu AMC sorkar aṭang­a paihthlak tumna a awm thu an tarlang a ni. Hemi chungchangah hian Lalrinenga Sailo chuan, tun hnuah chuan thil hrechiang loa thu chhuah awm tawh lo se an duh thu Vanglaini palai a hrilh.

Nimina meeting-ah PC Lal­ruat­sanga a tel a, C Lal­sawivunga erawh chu damlohna thil avangin a tel lo.