State pahnih ACF-te'n Ramthar zau enfiah

Kolasib district-a assistant conser­vator of forest (ACF) Lalnuntluanga leh Hailakandi district ACF-te chuan nimin khan Buhchangphai Ramthar zaua Kapzuala leh RK Laldawngliana-te thlám awmna an enfiah a, ram an teh nghal.

Kolasib aṭanga thu dawn dan­in, ACF Lalnuntluanga chuan, Ram­thar zaua Kapzuala leh RK Lal­dawngliana-te ram chu GPS hmanga enfiah mai an la ni tih a sawi a, "Hemi hmang hian Mizo­ram leh Assam sorkarte an la indawr zel ang," a ti.

Buhchangphai Ramthar zau enfiahnaa ACF Lalnuntluanga ṭawiawm turin Kolasib SP RP Meena chuan Vairengte aṭangin IR Police leh Bilkhawthlir Police Station OC leh a hote a tír a; Assam lam aṭangin Forest lam mi 10 rual leh police eng emaw zat an tel.

Buhchangphai Ramthar zau enhona leh tehnaah hian Assam lam mite chuan Genda aṭangin Bru mi 40 vel an hruai tel a, mahse chung mite chu an vaiin hawtir leh nghal an ni.

Zawhna chhangin, Kolasib SP RP Meena chuan, Buhchangphai aṭanga Mizo IR police-te an hnuh kîr (withdraw) chhan chu - Hailakandhi SP-in Mizoram lam hriattir loa Assam police-te Ramthar zaua rawn tir lut tawh lo tura a hriattir tawh vang a nih thu a sawi a; Central YMA hmalakna pawh tibuai lo turin Hailakandi SP a hriattir thu a sawi bawk.