Bike hâl vangin in a kâng

Thawhṭanni zan dar 11 vel khan Tuikual Tuichhunchhuah thlanga VL Ngaizuali d/o Rochungnunga (L) in a kâng a, darkar hnih vel chhungin ṭhelh mih a ni. In kan chhan hi in kawta bike inhûng, miin an hâl aṭanga kâng kai niin an sawi.

Tuikual South Local Council leh YMA chuan thuchhuah siamin, VL Ngaizuali in kawta Yamaha FZ bike MZ-01 K-2464 chu scooty-a chuang mi pahnihin an hâl a, chuta ṭang chuan in chu kâng kai niin an tarlang a, "Dawr atana luahtu Ramhmingliani leh Lyn Lalhmingmawii te bungrua engmah chuh hman loha a kângral vek hi pawi kan tiin kan tuarpui tak zet a ni," an ti. Bike hâltute chu a rang thei ang bera man a, an phû tâwka hrem ngei an phût thu an tarlang bawk.

Police aṭanga thu dawn danin, in kângah hian dawr leh puanṭhui dawr a awm a, bungrua chuh hman a awm lo a, dawr bungrua leh puanṭhuina hmanrua leh bungruate a kâng chhia a; bungrua kâng chhia hlut zawng hi cheng nuai 10 chuang a ni.