Aizawl Sahuanah Vavu chhuah a ni

Mizoram state bird, Vavu nu leh a pa chu nimin khan Environment & Forest minister Lalrinmawia Ralte-in Aizawl Zoological Park-ah a chhuah.

Vavu hi Panova, Chhinga Veng-te chhungkuain Aizawl Zoological Park-a dah turin Environment & Forest department an pe a ni.

Lalrinmawia Ralte chuan, Vavu chu Mizoram leh khawvel hmun dangah pawh a váng hle tih sawiin, Aizawl Sahuana chhuah tura pek a ni chu lawmawm a tih thu a sawi a, "Sahuan tan mai ni lo, Zofate tan rahbi pawimawh tak, nungcha humhalh kawngah harhna a thlen ngei ang tih ka beisei tlat a ni," a ti.

Nimina E&F minister-in a chhuah tak tel lo hian Aizawl Sahuanah Vavu paruk a awm sa a, inthlah pung turin breeding centre-ah dah a nih avangin mipui hmuh theih tura dah chhuah an ni lo. Nimina an chhuah tâkte erawh chu mipui en theih tura dah a ni.

Aizawl Zoological Park-ah hian ramsa 212 a awm a, a enkawlna atan kum 2013-14 chhung khan Rs. 1,60,53,300 sên a ni. Ramsa awm zingah hian a mang hlauhawm bik 64 awmin heng zinga 22 hi mammal an ni a, 42 dang chu reptile an ni.