Supreme Court-a chhanna pe turin Mizoram sorkar a inbuatsaih mek

Supreme Court-in Tripura-a Bru raltlante chungchangah sorkar laipui leh Mizoram sorkar chu insawifiah turin a hriattir a; sawifiah turin Mizoram sorkar chu a inbuatsaih mek.

Tripura transit camp-ah Bru raltlante dinhmun leh enkawl an nih dan chu a ṭha tawk lo nia ngaiin, Supreme Court-ah PIL thehluh a ni a; Supreme Court chuan a ngaihtuah hnuah, January 16, 2015 khan Ministry of Home Affairs leh Mizoram sorkar chu thil awm dan a zawt­fiah a, chawlhkar li chhunga chhanna thehlut turin a ti a ni.

Supreme Court thu bawhzui hian nimin khan chief secretary Lal­malsawma hoin Home department officer-te leh Mamit DC-te chu CS conference hall-ah an ṭhukhawm a; Tripura transit camp-a Bru-te enkawl dan ṭha tawk loa sawi chungchang leh Mizoram Bru-te hruai kîr dan turte an sawiho.

Bru raltlante chungchangah hian January 30, 2015 khian New Delhi-ah meeting pawimawh neih a ni dawn a, Mizoram sorkar aiawhin OSD (Home) David H Lalthangliana a tel ang.

The Hindu chanchinbu tarlan danin, Akhil Bharatiya Vanvasi Kalyan Ashram-in kum 2005-a petition an thehluh leh Asian Indigenous and Tribal Peoples-in kum 2007-a petition an thehluh kal zelah Supreme Court chuan January 16, 2015 khan order chhuahin, MHA chu na takin a khak a; hei vang hian MHA chuan Supreme Court lakah thuphá a chawi a ni. Petition-ah hian Tripura-a Bru raltlante dinhmun a chhiat thu leh sorkarin an enkawl ṭhat loh thu an ziak.

Supreme Court Social Justice Bench-a judge, Justice Madan B Lokur leh Justice UU Lalit chuan, MHA-in January 6, 2015-a Court-a thu a thehluhah, Bru-te enkawl dan a sawi chu a khak a, "Kum khatah sabawn pakhat, t-shirt pakhat leh kekawr pakhat in pe a, he ramah hian mihring dikna chanvo a awm ta lo em ni?" a ti a ni.

Supreme Court chuan, MHA, Mizoram sorkar leh Tripura sorkarte chu Tripura transit camp-a Bru-te chu ngaihsak tur leh, Mizoramah hruai kir an nih theihna tura chak zawka hma la turin a hriattir bawk. PIL pahnihte hi Supreme Court chuan February 27, 2015-ah a ngaihtuah leh ang.

Vanglaini palai zawhna chhangin, Home departmnent-a additional secretary Lalbiak­zama chuan, Bru lak let hna thawh leh hun tur an la tihchian loh thu leh, Bru lak letna atan pawisa cheng nuai li chuang an la neih thu a sawi.

Lalbiakzama chuan, Tripura transit camp-a Bru NGO-te chuan an thil phût - kum hnih chhung a thlawna ration pek, ṭan­puina sum Rs. 85,000 aṭanga Rs. 1,50,000-a tihsan leh hmun pakhata dahkhawmte chu an la phût reng tih a sawi a; nikum lama anmahni thua Mizoram Bru rawn lette chungchangah, Bru chhungkua 450 vel chu enfiah an ngaih thu a sawi bawk.