Model village enkawl dan tur zirho

Lok Sabha MP CL Ruala'n model village atana a thlan, Khawlailung leh Rajya Sabha MP Ronald Sapa Tlau-in model village atana a thlan, Chhiahtlang khuaa hma la tura ruatte tan nimin khan Serchhip DC conference hall-ah model village siamna scheme, SAGY chungchang zir­hona buatsaih a ni.

'Training on Participatory Planning of SAGY' hawngtu Ser­chhip DC Juhi Mukherjee chuan, India rama hmasawnna dik leh ngêlnghet a awm theihna turin chung lam aṭanga thuneituten engkim an ti ṭhin hi a dik famkim ṭhin lo tih a sawi a, "Mipuite a hnuai lam aṭanga an tel ve a pawimawh. India sorkarin 73rd leh 74th Constitutional Amendment siamin, Panchayati Raj a din a, mipui zawng zawng telna Gram Sabha dinin, an hnen thleng pha hmasawnna hna thawh kawnga ngaihdan leh duh dante an neih theih nan a ruahman a ni," a ti.

Training hian January 31, 2015 thleng a awh dawn a, SAGY thil tum leh awmzia te, hmalak dan turte leh ruahmanna siam dan turte zirho a ni ang.