February 9-13 ah Road Safety Week 2014 ah lirtheia chetsualna avangin mi 234 an thi
State Level Road Safety Council chu nimin khan Transport minister John Rotluangliana hoin a pisaah an ṭhukhawm a; February 9-13, 2015 chhungin Road Safety Week hman an rel. Meeting-ah hian, kum 2014 chhung khan Mizoram pumah lirtheia chetsualna vangin mi 234 an thi tih tarlan a ni.
John Rotluangliana chuan, lirtheia chetsualna vanga thihna tam tak thleng ṭhin ven nan United Nations General Assembly-in kum 2011-2020 chhung chu Decade of Action for Road Safety-ah a puan tawh thu a sawi a, "Hemi tihhlawhtlin nan hian India pawhin kawng hrang hranga hmalak a tum a, state tinte theihtawp chhuaha bawhzui ṭheuh tura ngenna pawh Union Minister of Road Transport hnen aṭangin kan dawng tawh a ni," a ti.
Meeting-ah hian, Road Safety Week pualin car flag siam te, Week hawn níah Aizawl khawpui veng tinah lirthei khalh fimkhur tura inzirtirna thu information mike hmanga puang tura ngen te, lirthei khalh chungchanga hriat tur pawimawh tarlanna lehkha siam a, zau taka sem chhuahte an rel a; Road Safety Week thupui atan 'Himna chungchang hi sawi satliah mai loin, i nunpui tlat ang u' tih thlan a ni.
Meeting-a tarlan danin, khawvel pumah lirthei chetsualna vangin kum tin mi 13,00,000 an thi a, India ramah kum tin mi 1,38,000 an thi. Mizoram bikah chuan kum 2014 khan chhinchhiah chinah lirthei chetsualna ṭum 132 a thleng a, mi 234 an thih phah a ni.