PAMRA hruaitute'n Larsap an kâwm

Peace Accord MNF Returnees Association (PAMRA) hruaitute chuan nimin khan Governor Dr Aziz Qureshi chu Raj Bhavan-ah an kâwm a, Mizoram leh Assam ramrîah buaina a awm lohna atan hma la turin an ngen.

PAMRA hruaitute hian Larsap chu ramri chung­chang bakah, Mizo­rama remna leh muan­na tluantling a awm zel theih nan kawng hrang hranga an pawl tana hma laksak tur te, India ram hmun danga Mizo zirlaite leh sumdawngte'n hamṭhatna hrang hrang an neih theihna turte leh, hmarchhak mite'n hmuhsitna leh enhranna an tawh ṭhin a tawp theihna atana hma la turin an ngen bawk.