KHAWTHLIR

Finance changtu chief minister Zoramthanga chuan INC member Lalrindika zawhna ziaka chhangin, Mizoram sorkarin a hnathawkte hlawh June leh July a bat rulhna tur sum a hranpaa hmuh a nih loh thu a tarlang a, "Amaherawhcu, central sorkar leh RBI-in Consolidated Sinking Fund aṭanga vbc. 100 lâk chhuah min phalsak avangin rulh theih a ni ang," a ti.

State Referral Hospital (ZMC)-ah nimin khan Covid-19 vei dah luh thar an awm lo a, rinhlelh thila dah luh mi pathum an awm thung. SRH-ah hian Covid-19 vei vangin mi 71 enkawl mek an ni a, SICU-ah mi pakhat awmin, mi dang zawng Isolation ward-ah an awm. Hripui vei enkawl mekte harsatna nei an awm lo a, eng emaw zat chu an chhuah thuai beisei a nih thu, SRH-ZMC Bulletin-in a tarlang.

Tunlaiin blood bank-ah thisen a tlem tih hriain Sihphira ṭhalaite chu nimin khan thisen pe turin an inhui khawm a, mipa pasarih leh hmei­chhia pahnihte'n Synod Hospital blood bank-ah thisen an pe.

Covid-19 donaa Myanmar ramria duty-na aṭanga rannung seh natna (scrub typhus) kaia thi ta, C Lalṭanpuia s/o C Sualneka, Champhai Vengthlang chu Mizoram sorkarin Rs. 1,00,000-in a rál dawn. Ràlna sum hi Chief Minister remtihnain CM Relief Fund for Covid-19 aṭangin pek chhuah a ni a, Champhai DC hnenah pek niin, ani'n a remchan angin C Lalṭanpuia chhungte hnenah a hlân ang.

District Council & Minority Affairs minister R Lalzirliana chuan INC member C Ngunlian-chunga zawhna chhang­in, sorkarin autonomous district council-te hnenah thuneihna tam zawk pek ṭha a tih thu House a hrilh a, "Thuneihna tam zawk an neih theih nan hmalakpuina a awm rih lo. Thuneihna sang zawk an neih remtih lohna a awm lo," a ti.