CM-in AR hotupa hnenah Ramria mau chìn a sawipui

Chief minister Zoramthanga chuan September 2, Nilainia CM banglaa Assam Rifles Director General (DG), Lt. Gen. Sukhdeep Sangwan nen an inkawmnaah, ramria mau chìn chungchang a sawipui.

Assam Rifles thu­chhuahin a tarlan danin, Chief Minister leh Assam Rifles DG-te hian Mizorama himna leh dan leh thupek kenkawh dan hrang hrangte an sawi dun a; CM Zoramthanga chuan, awlsam taka ramri paltlang zung zung a nih lohna turin ramrì-ah mau chìn a rawt a ni.

AR thuchhuah tarlan danin, Chief Minister hian ramriah mau hlíng nei chi (thorny variety of bamboo saplings) chìn a rawt a, chu'ng maute chu phun a nih chuan ramri a him sawt tur thu leh awlsam taka ramri paltlang theih a nih dawn loh thu a sawi. Aizawla Laldenga Centre of Excellence dinna kawng­ah AR puihna a dil bawk.

AR hotu lú, DG Lt. Gen. Sukhdeep Sangwan chuan, Mizoram nen boruak ṭha taka thawhho zel an duh thu leh, chumi kawnga Mizoram sorkar mi pawimawhte a dawr thei chu lawmawm a tih thu a sawi a; Ministry of Home Affairs-in Covid-­19 chungchanga thu zawm tur an tihte chu  ṭha taka an zawm tur thu Chief Minister hi a hrilh.