College principal-te'n RUSA an zirho Lungleiah engineering college din tum a ni

Rashtrya Uchchatar Shiksha Abhiyan (RUSA) state project office chuan nimin khan Govt. Aizawl College conference hall-ah Mizoram sorkara college principal-te leh coordinator-te pualin RUSA scheme zir chianna an buatsaih. He hunah hian, Mizoram Engineering College dinna tur project, cheng nuai 2,600 hu chu sorkar laipuiin a pawm tawh thu tarlan a ni.

Khuallian Higher & Tech­ni­cal Education minister R Romawia chuan, RUSA chu Mizoram tan bung thar pawimawh tak a nih tur thu sawiin, a hma lama zir chianna neih a ni chuan hlâwkna a thlen ngei a beisei thu a sawi a, "RUSA hi Mizoram tan a ṭha dawn nge dawn lo tih a hriatfiah theih rih loh. Mahse, he project aṭanga sum dawn ang angte chu Kristian ram kan nih ang ngeiin college hrang hrangte'n dik tak leh fel taka an hman ngei ka beisei," a ti.
R Romawia chuan, zirtirtute'n thingtlang lama awm an hreh ngawt lo nia sawiin, thingtlanga sawn an hreh chhan pakhat chu quarters awm loh vang niin a sawi a; thingtlanga quarters emaw, hostel emaw sakna tur 13th Finance Commission-ah dil mek a nih thu a sawi.
H&TEMinister chuan, Mizorama college tam zawkin hmunhmá ṭha an nei lo chu a pawi tih sawiin, college hrang hrangte'n UGC aṭang leh hmun dang aṭanga sum pawh chhuahna an hria a nih chuan, hmunhmá tur lei ngaihtuah hmasa se a duh thu a sawi a, "Kan ramin chaw báwm tinzâwn zirna a mamawh tawh a, degree nei thei lo tan pawh eizawnna tlak thiamna kan inpek theih a ṭul a ni," a ti.
Parliamentary decretary (H&TE) H Zothangliana pawh­in thu sawiin, sorkar sum harsat chhan leh a kaihhnawih inrenchem chungchangah motor thar lei leh thil dang mawhpuh tur a nih loh thu a sawi a, "Kan zavai mawhphurhna a ni. Ka duh dan chuan kum khata DA vawi hnih pung ka tibo êm lo a nih pawhin vawi khatah ka tihniam ang, tichuan vai­belchhe têl kan hum theiin ka ring," a ti.
Workshop on RUSA hi H&TE secretary K Lal­nghing­lova'n a kaihruai a; technical session-ah RUSA state additional project director Prof. KL Pradhan-a'n RUSA chungchanga hmalakna a sawi.
Prof. KL Pradhan-a sawi danin, tun hnaia RUSA Project Approval Board meeting, New Delhi-a neihah 12th Plan Period atan Mizoram Higher Education Plan component pawh pawm a ni,
Mizoram Higher Education Plan pawm tawhte chu - Hrangbana College leh Zirtiri Residential Science College-te model college-a hlankai (sum ruahman cheng nuai 200), Mizoram sorkara college 21-te thuam ṭhatna atan college pakhat tan cheng nuai 200 zel leh, Lungleia Mizoram Engineering College din nan cheng nuai 2600 te a ni.