Khawthlir
Thisen pe
Rawpuichhip branch KṬP chuan nimin khan an kohhran hall-ah blood donation camp an buatsaih a, Aizawl Civil Hospital tan thisen unit 41 an pe a, a petute mipa 31 leh hmeichhia 10 an ni. Serchhip Chanmari branch YMA pawhin nimin khan JN Hospital (Serchhip District Hospital)-ah thisen unit 12 an pe a, a petute mipa 11 leh hmeichhia pakhat an ni.
Home meeting
Mizoram Homes Association chuan nimin khan Aizawlah General Body Meeting an nei a, Mizoram hmun hrang hranga home dintu leh enkawltute an tel. Hruaitu thar thlangin president-ah Lalramchuanga leh general secretary-ah Liansangluri an thlang.
Mei zu man
Lunglei district leh Kolasib district-a Anti Tobacco Squad te chuan nimin khan an awmna khawpuiah COTPA dan bawhchhia an awm leh awm loh an enfiah a, phal lohna hmuna mei zu pakhat ve ve manin, pawisa an chawitir.
College rawk
J Thankima College, Bawngkawn chu Thawhlehni zan khan rawk a ni a, Rs. 10,000 leh laptop an rû.
Server siam dawn
Information & Communication Technology department chuan thuchhuah siamin, Mizoram sorkar department leh PSU website an enkawl mek 129-te chu a server an siamṭha dawn tih an tarlang a, "Hei vang hian January 28 zing dar 9:30 aṭanga January 31 zan 11:59 chhungin website tlawhtute tan harsatna a awm palh thei a, mipuite hriatthiamna kan ngen a ni," an ti.
In kâng
Thawhlehni chawhnu dar 2:30 vel khan Serchhip district-a Hmunzawl khuaa Lalduhawma in chu bungraw chuh hman lohin a kâng ral a, thi leh hliam an awm lo. Lalduhawma hi khawtlangin nimin khan in an sak ṭhatsak nghal a, bialtu MLA Vanlalawmpuii'n in chung tur rangva a pe a ni.